Gjilan – Në Komunën e Gjilanit sot në një organizim solemn është bërë shpërndarja e certifikatave për mësimdhënësit e klasave 1-5 për trajnimin e organizuar nga GIZ, MASHT-i dhe Komuna e Gjilanit me temën “Matematika dhe mësimdhënia e matematikës”, në kuadër të implementimit të programit “Zhvillimi i kapaciteteve në sektorin e arsimit fillor në Kosovë”.
Në këtë trajnim janë të përfshirë një numër i madh i mësimdhënësve ndërsa ky program i trajnimeve është implementuar në dy faza, gjatë muajve maj – qershor dhe shtator – nëntor 2012.
Komunat e përzgjedhura për fazën e parë të projektit janë Gjilani, Kaçaniku, Fushë Kosova, Klina, Prizreni dhe Prishtina. Të pranishëm në ndarjen e certifikatave ishin kryetari i Komunës së Gjilanit, Qemajl Mustafa, Drejtori i Drejtorisë Komunale të Arsimit, Bujar Nevzati përfaqësuesit e GIZ-it, përfaqësues të organizatave vendore dhe ndërkombëtare, mësimdhënës, dhe mysafir të tjerë.
Me këtë rast kryetari Mustafa, tha se përqendrimi në këtë nivel nga klasa e parë deri të pestën është një caktim i veçantë dhe më ka lënë shumë përshtypje pozitive, sepse nga kjo moshë fëmijët fillojnë të marrin hapat e parë të dijes, por edhe përcaktimi se në cilin sektor të shkencës ata në të ardhmen do të orientohen. “Në këtë moshë bëhet formësimi i personalitetit, por trajnimi juaj për lëndën e matematikës dhe mësimdhënien e matematikës është dhjetësha e goditjes, sikur që është në shenjtari sepse shumica e studentëve tanë kur i përfundojnë studimet dalin me notën jo më të mirën në matematikë , por edhe dalin me ngarkesën që matematika nuk është atraksion, por është në të kundërtën, është njëfarë ngarkese. Por dua t’ju them se nuk ka njeri që prej mëngjesit e deri në mbrëmje nuk bënë llogaritje dhe matje të ndryshme edhe pse nuk është i profesionit të matematikës. Matematika është pikëpjekje me secilën lëmi dhe është prezentë në të gjitha sferat e tjera të jetës”.
Kurse Bujar Nevzati, nga drejtoria e arsimit tha se trajnimi kishte qëllim që mësimdhënësve që e shpjegojnë lëndën e matematikës nëpër shkolla t’ua mundësojnë një ligjërim më të lehtë dhe më kualitativ të lëndës së matematikës nëpër shkolla.
Nevzati falënderoi përfaqësuesit e GIZ-it për këtë projekt të qëlluar dhe tha se jemi shumë të kënaqur që këtë dijeni që e keni marrë shtesë, t’a shpërndani te nxënësit tuaj nëpër shkollat dhe klasat ku ju jeni të angazhuar. Ai uroi mësimdhënësit të cilët do të marrin çertifikatat, ndërsa theksoi bashkëpunimin e mirë të GIZ-it me Komunën, bashkëpunim të cilin do ta vazhdojmë edhe në të ardhmen.
Menaxherja e programit të GIZ-it për programin e shkollave fillore Dagmat Hurtshmit tha se është shumë e lumtur që sot po bëhet shpërndarja e çertifikatave. “Testet janë të kaluara shumë mirë dhe me rezultate shumë të mira. Por secilin nga ju dua ta pyes se a keni dhënë maksimumin, sigurisht që jo, mirëpo mundohuni që maksimalisht të përkushtoheni në mësimdhënien por edhe në vlerësimin e asaj çka ju i ofroni nxënësve dhe mësimet e marra nga ana e nxënësve.
Sot certifikata kanë marrë 110 mësimdhënës të shkollave të ndryshme të Komunës së Gjilanit që janë të angazhuar në klasat 1-5. /rajonipress/
