CDI e interesuar të vazhdojë me projekte në Viti

Viti – Përfaqësues të organizatës CDI kanë vizituar sot Komunën e Vitisë me këtë rast ata janë takuar me Kryetarin e kësaj Komune Sokol Haliti ku kanë bashkëbiseduar lidhur me projektet të cilët janë bashkëfinancuar në fushën e ujësjellësit.

Sokol Haliti ka thënë se ai është i gatshëm të bashkëpunoj me organizatën CDI, por kërkoj që të rishikohen projektet e mëparshme në fushën e ujësjellësit. “Jam i gatshëm të bashkëpunoj me ju dhe atë në çdo kohë, por përveç projekteve të reja të cilat i keni në fushën e ujësjellësit në viset rurale ju lus të rishikoni mundësitë e funksionalizimit të ujësjellësve në fshatrat si Skifteraj dhe Beguncë, ku qytetarët edhe pse kanë sistemin e ujësjellësit nuk kanë ujë të pijshëm“ u shpreh Haliti.

Ai gjithashtu theksoi se është duke i shikuar të gjitha mundësitë që projektet e ujësjellësit dhe kanalizimit të përfundojnë sa më parë me qëllim që më pas të mund të fokusohet në fushën e zhvillimit ekonomik të komunës, por vuri re se mundësitë buxhetore janë më të vogla sesa mundësitë, prandaj sipas tij nevojitet ndihma e donatorëve.

Ndërsa Drejtori i organizatës CDI, Astrit Vokshi tha se kjo organizatë së shpejti do të përfundon projektet e ujësjellësit në fshatrat e Komunës së Vitisë, por theksoi se së pari duhet të përfundojnë disa çështje financiare dhe teknike.

Ai tha se kjo organizatë akoma nuk ka bërë përzgjedhjen e komunave me të cilën do të punon gjatë viteve në vijim.”Kur do të përfundojnë punët në sistemin e ujësjellësit në fshatrat e Vitisë ato do të merren nën menaxhimin e kompanive regjionale, por ne jemi duke shikuar mundësitë që në ato fshatra ku ka përfunduar sistemi i ujësjellësit dhe nuk ka ujë të pijshëm për shkaqe të ndryshme të rishikohen dhe të bëhet rehabilitimi i tyre” u shpreh Vokshi.

Kryetari Haliti ndër të tjerash theksoi se nga një analizë e mëparshme del se sistemi aktual i ujësjellësit në Viti ka humbje të ujit për shkak të gypave të vjetruara, por vuri në pah se nevojitet një donator që të largohen gypat e vjetër të cilët janë nga asbest betoni, material ky që është cilësuar si kancerogjen.

Në këtë takim është folur edhe lidhur me mundësinë e bashkëpunimit të komunës së Vitisë dhe kësaj organizate në të ardhmen, ndërsa përveç Drejtorit të CDI-së Astrit Vokshi kanë marrë pjesë edhe përfaqësues të tjerë të kësaj organizate si Agon Haxhikadria dhe Lavdim Osmanaj./rajonipress/