“Caritas Kosova” bashkëfinancon në Gjilan

Gjilan- Kryetari i Komunës së Gjilanit Qemajl Mustafa dhe drejtori i përgjithshëm i “Caritas Kosova”, Don Viktor Sopi, kanë nënshkruar sot një marrëveshje Bashkëpunimi dhe Bashkëfinancimi, për financimin e projektit të përbashkët “Përkujdesja shëndetësore shtëpiake dhe ambulatore në Gjilan”.

Kjo marrëveshje parasheh përmirësimin e shërbimit shëndetësor shtëpiak për familje në nevojë të Komunës së Gjilanit dhe zonave rurale të kësaj komune, të cilët kanë persona të sëmurë dhe të moshuar në familje dhe që kanë nevojë për përkujdes shëndetësor permanent si dhe rritjen e standardit të jetesës, duke përmirësuar cilësinë e shërbimeve mjekësore në familjet e tyre.

Po ashtu kjo marrëveshje parasheh edh ngritjen e nivelit të kujdesit shëndetësor ambulator duke angazhuar staf mjekësor në kuadër të QKMF në Gjilan.

Po ashtu në këtë marrëveshje është i definuar plani i veprimit të cilin do ta realizojnë bashkë Komuna dhe “Caritas Kosova”.

Vlera e përgjithshme e këtij projektit do të jetë 65.000.00 euro, nga e cila, “Caritas Kosova” do të merr pjesë me 22.730.00 euro, ndërsa pjesa tjetër, prej 42.270.00, do të hiqet nga Komuna.

Kjo marrëveshje parasheh periudhën kohore të implementimit, nga data 15 korrik deri 31 dhjetor 2012, ndërsa bashkëpunimi do të jetë i ngushtë edhe me drejtorinë komunale për Shëndetësi dhe Mirëqenie Sociale dhe QKMF-në, ka bërë të ditur pjesë të marrëveshjes, Drejtori Komunal i Shëndetësisë Xhemajl Salihu./rajonipress/