Cana e fitoi Kupën e Italisë me Lazion

Lorik Cana e ka fituar Kupën e Italisë me Lazion. Skuadra Biancoceleste ia doli ta mposht Romën sonte në stadiumin Olimpico, në derbin romak, me rezultat 1:0, në një atmosferë të shkëlqyeshme dhe një ndeshje me rivalitet të lartë.

Futbollisti shqiptar me shokë festuan në fund falë golit të shënuar nga mesfushori Senad Lulic në minutën e 71-të të ndeshjes.

Disa minuta më pas, Giallorossi e qëlluan tërthorësen me kapitenin Francesco Totti, por portieri Frederico Marchetti ishte me fat.

Roma pati më shumë tentime drejt portës, por në fund dështoi ta fitonte këtë trofe. Në Superkupën e Italisë, Lazio do të luajë me kampionin e Serie A, Juventus.

Falë kësaj fitoreje, Lazio do të marrë pjesë në Europa League sezonin e ardhshëm.