Buxhovi: LDK në krizë!

Lidhja Demokratike e Kosovës (LDK) nuk ka arritur t’u përshtatet rrethanave politike, prandaj ka rrezik të degradohet sepse disa përfaqësues e kanë shndërruar këtë parti në “sallamadi”. Kështu mendon Jusuf Buxhovi, publicisti, historiani dhe shkrimtari që konsiderohet si ideatori i kësaj partie politike.

Në intervistën dhënë “Zërit”, ai thotë se LDK-ja nuk mund të konsiderohet si fituesja e zgjedhjeve të fundit, ndërsa deklaratat për fitore, ai i konsideron vetëm si mashtrim. Megjithatë “Jeniçeri i fundit” e konsideron LDK-në si parti bazë në Kosovë, edhe pse shumë anëtarë, sipas Buxhovit, nuk e kanë vendin aty, “madje as nuk e kanë pasur kurrë.”.

Ai e sheh rrezik edhe luftën për kreun e partisë ndërmjet kryetarit aktual dhe atij të nderit, sidomos pas deklaratave për “puç e kundërpuç”.

“…gjuha ideologjike që po përdoret (puç, kundërpuç e të ngjashme) përkujton se ‘kuvendi i karrigeve’ jo vetëm që nuk ka qenë i rastit, por mund të jetë pjesë e të njëjtit skenar…”, konsideron Buxhovi.

Ai flet edhe për bisedimet Prishtinë –Beograd, për të cilat thotë se duhet të kishin epilogun e njohjes nga ana e Serbisë, ndërsa e konsideron gabim që në këtë proces nuk është përfshirë Lugina e Preshevës.
Ish-gazetari i dikurshëm i “Rilindjes” i cilëson si despotë edhe liderët tjerë institucionalë në Kosovë, të cilët, siç tha ai, po mundohet t’i mbrojnë “grupet mafioze”.

Zëri: Z. Buxhovi. Ju jeni ideatori i formimit të LDK-së. Si i shihni zhvillimet në këtë parti. A ka evoluar partia apo ka mbetur në konturat ku ka qenë?

J. Buxhovi: Lidhja Demokratike e Kosovës, ka filluar si lëvizje kombëtare dhe ka përfunduar në parti politike çka është fare e natyrshme kur dihen rrethanat në të cilat është formuar (gjatë okupimit serb) dhe ato që erdhën pas aprovimit të Rezolutës 1244 të vitit 1999 kur Kosova u vu nën protektoratin ndërkombëtar. Ky vlerësim nuk është formal, por thelbësor, meqë lejon pamjen e saj të drejtë qoftë nga pikëpamja historike (me merita të mëdha në gjithë procesin e shtetformimit), qoftë nga pikëpamja aktuale, ku ajo edhe më tutje ruan rolin e një barometri të pluralizmit tonë politik pa marrë parasysh çfarë është, vlerësim ky që pastaj mundëson për t’u kuptuar më mirë e djeshmja dhe e sotmja e realitetit tonë shoqëror. (Zëri)