Nënshkruhet marrëveshja për kyçjen e 300 ekonomive familjare në rrjetin e ujësjellësit në Hogosht

Kamenicë – Me një investim prej 80 mijë eurosh, 300 ekonomi familjare në fshatin Hogosht do të kyçen në rrjetin e ujësjellësit, pas nënshkrimit të Marrëveshjes së Mirëkuptimit ndërmjet Komunës së Kamenicës dhe KRU “Hidromorava”.

Marrëveshja u nënshkrua nga kryetari i Komunës së Kamenicës, Kadri Rahimaj, dhe kryeshefi ekzekutiv i KRU “Hidromorava” Sh.A. Gjilan, Ymer Salihu, në prani të drejtorit të DSHPAIE-së, Zotrim Kastrati, dhe menaxherit të njësisë së KRU “Hidromorava” në Kamenicë, Sherif Thaqi.

Projekti parasheh instalimin e kyçjeve shtëpiake në sistemin e ujësjellësit për banorët e Hogoshtit, punime që do të realizohen nga një kompani e licencuar nga Autoriteti Rregullator për Shërbimet e Ujit (ARRU).

Kryetari Rahimaj e vlerësoi marrëveshjen si një hap të rëndësishëm drejt përmirësimit të furnizimit me ujë të pijshëm për banorët e këtij fshati.

“Me këtë bashkëpunim do të realizohet kyçja e 300 ekonomive familjare në rrjetin e ujësjellësit, në vlerë prej 80 mijë eurosh. Ky projekt do t’u mundësojë banorëve të Hogoshtit qasje më të lehtë në shërbimin e ujësjellësit dhe ne do të vazhdojmë të punojmë për përmbushjen e nevojave të qytetarëve në çdo lokalitet”, tha Rahimaj.

Nga ana tjetër, kryeshefi ekzekutiv i KRU “Hidromorava”, Ymer Salihu, theksoi se marrëveshja dëshmon bashkëpunimin e mirë me Komunën e Kamenicës dhe synon përmirësimin e infrastrukturës ujore, si dhe rritjen e cilësisë së shërbimeve për konsumatorët.

Realizimi i këtij projekti pritet të përmirësojë ndjeshëm qasjen në ujë të pijshëm për qindra familje në Hogosht, duke kontribuar në ngritjen e standardit të jetesës dhe zhvillimin e infrastrukturës lokale./rajonipress/