Bunjaku ‘sulmon’ Gegën

Kalimi i Albion Avdijajt nga Përfaqësuesja e Kosovës te Kombëtarja e Shqipërisë, ka bërë që përzgjedhësi Albert Bunjaku të ndihet i tradhtuar. Ai nuk është kontaktuar për këtë çështje as nga futbollisti e as nga përzgjedhësi i Shqipërisë U-21, Skënder Gega, pavarësisht marrëveshjes Kosovë-Shqipëri për raste të tilla të këmbimit të futbollistëve. Në një prononcim për gazetën Arena, Bunjaku ka thënë që kjo mënyrë e ‘transferimit’ të Avdijajt duhet të mbetet në ndërgjegjen e Gegës.

“Albioni nuk më ka kontaktuar direkt mua. Lajmin se ai i ka thënë ‘po’ Kombëtares së Shqipërisë e kam lexuar nëpër gazeta. E nëse ai është i vërtetë, unë s’kam çfarë të them më tepër. Ne me palën e Kombëtares së Shqipërisë jemi marrë vesh që të kontaktojmë në raste të tilla, por ata nuk janë lajmëruar. Kjo duhet të mbetet në ndërgjegjen e Skënder Gegës”, deklaroi Bunjaku për gazetën Arena.

Tutje, ai ka folur edhe rreth ftesës së Kombëtares së Gjermanisë për futbollistin tjetër të Përfaqësueses së Kosovës, Enis Bunjakin. Duke zbuluar se ka qenë moti në dijeni për një gjë të tillë, Bunjaku vlerëson se Gjermania është një rast i madh për Enisin…(Arena)