Bunjaku Rexhepi takon KFOR-i turk për avancimin e pozitës së femrës në shoqëri

Gjilan – Kryesuesja e Kuvendit të Komunës, Valentina Bunjaku-Rexhepi, ka pritur në një takim pune komandantin e KFOR-it turk në Gjilan (LMT), Hakan Derican, me të cilin kanë bashkëbiseduar për mundësinë e bashkëpunimit në mbështetjen e femrës në shoqëri dhe krijimin e lehtësirave shtesë në angazhimin e saj në aktivitete të ndryshme që kanë qëllim përmirësimin e pozitës së saj në shoqëri.

Me këtë rast kryesuesja Bunjaku-Rexhepi, e ka informuar delegacionin e KFOR-it me gjendjen në përgjithësi sa i përket Kuvendit të Komunës dhe përfaqësimit gjinor atje, por gjithashtu edhe për pozitën e femrës në përgjithësi në Komunën e Gjilanit.

“Kuvendi i Komunës ka në përbërjen e vet një numër të konsiderueshëm të femrave si këshilltare komunale. Gjithashtu, me mbështetjen e kryetarit të Komunës është themeluar edhe rrjeti jo-formal i grave ndërmarrëse, pastaj poashtu kryetari Haziri ka nxjerrë vendimin për zbatimin e rekomandimeve të Komitetit për Barazi Gjinore, që ka qëllim mbështetjen dhe përkrahjen specifike të femrës kryesisht në zhvillimin ekonomik dhe në agro-biznes, por gjithashtu me angazhim të Komunës dhe në mbështetje nga Bashkimi Evropian është duke u punuar strategjia për zhvillimin e bizneseve të udhëhequra nga gratë. Edhe sa i përket punësimit në kushte të barabarta gjithnjë janë mbështetur femrat, sepse pa femra të fuqishme nuk ka as familje të qëndrueshme dhe as zhvillim të institucioneve”, ka thënë, mes tjerash, kryesuesja Bunjaku-Rexhepi.

Ajo më tej ka ofruar gatishmërinë e plotë të Kuvendit të Komunës në projekte të përbashkëta me KFOR-in Turk me qëllim të përkrahjes së femrës në shoqëri.

Nga ana e tij, komandanti i KFOR-it Turk, Hakan Derican, nga njësia LMT në Gjilan, ka kërkuar nga kryesuesja që të dërgojnë projekte që kanë qëllim pozitën e femrës dhe përmirësimin e saj, në mënyrë që avancimi i mëtejmë të jetë edhe më i lehtë, karshi një regjioni që është mjaft i qeti në nivel vendi./rajonipress/