Bullgari i paraqitur si kosovar, përdhunon 55 vjeçaren gjermane

Policia në Aschaffenburg ka zbardhur krimin e kryer më 20 shtator, me ç’rast një azilkërkues 28 vjeçar i paraqitur si shtetas nga Kosova, kishte përdhunuar një gjermane 55 vjeçe. I dyshuari jetonte me familjen e tij në një shtëpi azili, me dokumente të rrejshme.

Bullgari e kishte marrë me dhunë gjermanen derisa ajo po e ngiste biçikletën, e kishte futur në një arë me misër dhe e kishte përdhunuar në mënyrë brutale. Para se të ikte, ai i kishte marrë asaj edhe unazën e martesës, një qafore ari dhe kuletën me para.

Pas kërkimeve të gjata të pasuksesshme policia i ka rënë në gjurmë personit në fjalë falë analizës së ADN-së që i është bërë gjurmëve që ai ka lënë në vendin e krimit. Këto gjurmë ishin përshtatur me ato të një njeriu nga Bullgaria, bën të ditur në një komunikatë shtypi policia e Aschafenburgut. Kështu, policia gjermane në bashkëpunim me policinë bullgare ka shpallur kërkim ndërkombëtar për shtetasin bullgar, i cili doli se në vendin kishte vuajtur burg e tij për grabitje.

ADN-ja bashkë me shenjat e gishtërinjve ka shpënë përfundimisht te personi i paraqitur në azil nga korriku i këtij viti bashkë me familjen si kosovar. Pikërisht në shtëpinë e azilit në Asschaffenburg edhe është arrestuar të enjten “kosovari” i rrejshëm. Ai ka pranuar veprën gjatë marrjes së parë në pyetje. /albinfo/