Bulevardi i Gjilanit nën pikëpyetje: Punimet vazhdojnë, por qytetarët pyesin – kur do të përfundojë projekti?

Gjilan – Punimet në bulevardin e qytetit të Gjilanit kanë rikthyer në vëmendje debatin për prioritetet, ritmin dhe mënyrën e realizimit të projekteve publike. Ndërsa makineritë dhe punëtorët janë parë në terren, një numër qytetarësh shprehin pakënaqësi për dinamikën e punimeve dhe skepticizëm nëse projekti do të përfundojë brenda afateve të parapara. Kritikat, të adresuara kryesisht ndaj udhëheqjes komunale dhe kryetarit Alban Hyseni, janë të ndryshme nga cilësia dhe prioritetet e investimeve, deri te menaxhimi i përgjithshëm i projekteve infrastrukturore.

Në diskutimet publike, qytetarët kanë ngritur pyetje nëse një projekt i tillë duhej të ishte ndër prioritetet kryesore të qytetit, në një kohë kur, sipas tyre, Gjilani përballet edhe me probleme të tjera infrastrukturore që kërkojnë zgjidhje.

Njëri prej qytetarëve, Hafiz Rudi, ka shprehur një qëndrim tejet kritik. Ai vlerëson se prioritet duhej të ishin impiantet për trajtimin e ujërave të zeza dhe sistemi i ujërave atmosferike, duke argumentuar se problemet mjedisore dhe infrastrukturore në qytet janë më urgjente se ndërhyrjet në bulevardin qendror.

Në reagimin e tij, Rudi kritikon edhe mënyrën e menaxhimit të projekteve, duke ngritur shqetësime për cilësinë e punimeve dhe përgjegjësinë institucionale. Ai e përmbyll reagimin me një akuzë të fortë politike ndaj menaxhimit komunal, duke pretenduar se gjatë mandatit nuk është përfunduar asnjë projekt i rëndësishëm.

Një tjetër shqetësim i qytetarëve lidhet me vizionin për zhvillimin e Gjilanit. Bardhyl Januzi e zhvendos debatin nga bulevardi te infrastruktura strategjike, duke argumentuar se qytetit i nevojiten lidhje më të mira rrugore me Prishtinën, Prizrenin, Ferizajn, Shkupin dhe korridoret e tjera rajonale.

Sipas tij, investimet e mëdha në infrastrukturën rrugore do ta vendosnin Gjilanin në një pozitë më konkurruese në rajon, do të ndikonin në hapjen e vendeve të reja të punës dhe do të krijonin mundësi për zhvillim ekonomik.

Kritika më e përsëritur, megjithatë, duket të jetë ritmi i punimeve. Qytetari Ismail Kastrati, me një koment ironik, shkruan: “Më shumë shikues sesa punëtorë”, duke shprehur frikën se me këtë ritëm projekti mund të zgjasë për vite.

Kastrati e krahason situatën me projekte të tjera infrastrukturore që, sipas tij, janë zvarritur gjatë, duke përmendur në mënyrë kritike edhe stadiumin dhe autostradën.

Ndërkohë, reagimi i Zijadin Bajramit është edhe më i ashpër. Duke iu drejtuar autoriteteve komunale, ai shkruan: “E keni shkatërru parkun e qytetit o kanibal.” Ky koment pasqyron pakënaqësinë e një pjese të qytetarëve për ndërhyrjet në hapësirat publike dhe mënyrën se si po ndryshon pamja urbane e qytetit.

Projekti mes premtimeve dhe skepticizmit

Përtej gjuhës së ashpër të disa komenteve, ajo që bie në sy është mungesa e besimit të një pjese të qytetarëve në përfundimin e punimeve brenda afatit të planifikuar. Në vend që projekti të shihet vetëm si një investim për modernizimin e qendrës së Gjilanit, ai është shndërruar në një debat më të gjerë mbi mënyrën se si komuna i përcakton prioritetet dhe i menaxhon investimet publike.

Për kryetarin Alban Hyseni, kjo valë reagimesh përbën një sfidë që kërkon përgjigje konkrete: Cili është afati real i përfundimit? A do të respektohet dinamika e paraparë? A është cilësia e punimeve në nivelin e kërkuar? Dhe, mbi të gjitha, a do ta shohin qytetarët në fund një bulevard që justifikon ndërhyrjen dhe investimin?

Këto janë pyetje që nuk mund të marrin përgjigje vetëm përmes deklaratave politike. Përgjigjja më bindëse do të jetë vetë rezultati i projektit, cilësia e tij dhe koha në të cilën do t’u dorëzohet qytetarëve.

Ndërkohë, Gjilani vazhdon të presë. Makineritë punojnë, qytetarët vëzhgojnë, ndërsa skepticizmi rritet. Në fund, qytetarët nuk kërkojnë vetëm që të punohet, kërkojnë që të punohet mirë, me përgjegjësi dhe brenda afatit./rajonipress/