Bujar Nishani, president i ri i Shqipërisë

Është zgjedhur presidenti i ri i Republikës së Shqipërisë. Bujar Nishani zgjidhet president me 73 vota pro të deputetëve të Kuvendit të Shqipërisë.

Nishani ishte kandidati i tretë i mazhorancës për president të vendit. Këtë e konfirmoi paradite kryetari i Grupit Parlamentar të Partisë Demokratike, Astrit Patozi, menjëherë pas një takimi kokë më kokë Berisha-Meta.

Nga 76 deputetë të Kuvendit të Shqipërisë që votuan për kandidatin e vetëm, Bujar Nishanin, 73 votuan për, një ishte kundër, si dhe dy fletëvotime ishin të pavlefshme.

Opozita ka bojkotuar votimin e presidentit.

Nishani është zgjedhur president i Shqipërisë pas raundit të katërt të votimit për president, pasi dy kandidatët e tjerë për president, ishin tërhequr nga gara. Ai është presidenti i gjashtë i Shqipërisë.

Para kandidimit për këtë post, Nishani ishte ministër i Brendshëm i vendit. /Telegrafi/