Bujanocit i kthehet gjykata themelore, Preshevës për kundërvajtje?

Me propozimin e ligjit për selitë dhe rajonet e gjykatave dhe prokurorive, i cili po shqyrtohet në Kuvendin e Serbisë, është paraparë që në Bujanoc të kthehet gjykata themelore, ndërsa Presheva do të ketë gjykatën për kundërvajtje dhe degën e prokurorisë themelore. Sekretari i Shtetit në Ministrinë e Drejtësisë së Serbisë, Nexho Jovanoviq dje në Bujanoc ka informuar liderët shqiptarë nga Presheva dhe Bujanoci.

Në takim ishin të pranishëm edhe shefi i Trupit koordinues të Qeverisë së Serbisë për komunat e Preshevës, Bujanocit dhe Medvegjës, Zoran Stankoviq dhe shefi i zyrës së OSBE-së në Bujnaoc, Erik Menton.

Jovanoviq ka vlerësuar se me këtë Projektligj për selitë në rajonet e gjykatave dhe prokurorive , Bujanoci dhe Presheva janë në dobi. Mirëpo, kryetari i Komunës ë Bujanocit Nagip Arifi tha se Kuvendi i kësaj komune në prill ka kërkuar që në Bujanoc dhe Preshevë të kthehen gjykatat dhe prokuroria, për të cilën amendamente në Propozimin e ligjit i ka bërë deputeti Riza Halimi.

Arifi tha se po kërkohet edhe hapja e repartit të Gjykatës së Lartë në Bujanoc dhe Preshevë. Sekretari i shtetit tha se për ato kërkesa të Bujanocit dhe Preshevës do të informojë Ministrin e Drejtësisë Nikolla Selakoviq dhe propozimet “do t’i nënshtrohen analizës”.