Boksierët profesionistë pretendojnë se janë më të suksesshmit ndër sportistët shqiptarë

Prishtinë – Haxhi Krasniqi ishte kampion i Evropës në boksin profesionist. Ai tani mban titullin “WBO International”, ndërsa më 16 mars do të boksojë për titullin e kampionit të botës, në kategorinë gjysmë të rëndë të versionit WBO.

Nuri Seferi është kampion i Evropës në boksin profesionist. Ai mban titullin evropian të versionit WBO në kategorinë kruzer.

Titujt që mbajnë, ata që kishin e ata që i synojnë si edhe sukseset e mëhershme të boksierëve shqiptarë në nivelin profesionist ka bërë që Krasniqi e Seferi të vlerësojnë se boksierët profesionist janë më të suksesshmit ndër sportistët shqiptarë. Sipas tyre sukseset që kanë boksierët shqiptarë të nivelit profesionist nuk i kanë sportistët shqiptarë që garojnë në sporte tjera.

“Unë besoj se ne shqiptarët në boks kemi potencial të madh. Nuk di sport tjetër ku shqiptarët janë të suksesshëm si në boksin profesionist”, ka thënë Haxhi Krasniqi. Ai në boksin profesionist njihet edhe me emrin Robin.

Krasniqi 25-vjeçar aktualisht vlerësohet boksieri më i suksesshëm shqiptarë. Ai në profesionizëm ka 39 fitore e dy humbje. 15 fitore i ka arritur me nokaut. Krasniqi përfaqëson Gjermaninë, vend në të cilin edhe jeton. Ai më 16 mars në Londër përballet me kampionin e botës të kategorisë gjysmë të rëndë të versionit WBO, uellsianin Nathan Cleverly.(koha)