Bllokohet PTK-ja

Punëtorët e Postës kanë ndërprerë punën në të gjitha zyrat e PTK’së nëpër Kosovë. Krejt kjo pasi menaxhmenti nuk po ua jep bonuset sikurse veproi me punëtorët e Valës dhe Telekomit. Sipas sindikalisteve, deri në realizmin e kërkesave nuk do të ofrohet asnjë shërbim, përveç dërgesave postare.

Prej të enjtes Post-Telekomi i Kosovës kryen vetëm shërbime postare. Të gjitha shërbimet tjera janë bllokuar në kohë të pacaktuar.

Kryesia e Sindikatës Profesionale të Postes se Kosovës, ka vendosur për ndërprerjen e punës neper të gjitha zyrat e PTK-së nëpër Kosovë, pasi menaxhmenti nuk po ua jep bonuset sikurse veproi me punëtorët e Valës dhe Telekomit.

Si pasojë, deri në realizmin e kërkesave sindikalistet thonë se nuk do të ofrohet asnjë shërbim, përveç dërgesave postare.

“Ne emër të përfaqësimit të drejtave të gjithë punonjësve të diskriminuar SPP, FS e PTK nuk është përgjegjëse, për destabilizimin e procesit te punës, andaj masat e vetme për ndërgjegjësimin e dhe eliminimin e vendimeve të gabuara të paligjshme të menaxhmentit të PTK-së, prej sot dt. 27/12/2012 ora 15:00 do të jenë ndërprerja e punës, mbyllja e zyrave të shitjes, ku për dëmet financiare përgjegjësia direkte bie mbi shkaktarët e diskriminimit të punëtorëve e që janë menaxhmenti i PTK-së”, thuhet në komunikatën e lëshuar nga SPP.

Se çfarë do të jenë pasojat e kësaj bllokade zyrtarët e PTK-së nuk kanë dashur ta komentojnë. Ata kanë premtuar se do të dalin me një sqarim për opinion, por nuk e kanë bërë një gjë të tillë.

Sekretari i kësaj sindikate, Sadri Shala, ka thënë për “Express” se kjo nënkupton që nuk do të kryhet asnjë shërbim, përveç dërgesave postare.

“Prej orës 3 sot bllokohet procesi i punës në të gjitha zyrat postare në nivel të Kosovës. Deri në realizimin e kërkesave tona, që është marrja e bonuseve për punëtorët e Postës, vazhdon bllokada”, ka thënë Shala.

Menaxhmenti i PTK-së ditë më parë vendosi që bonuset t’i ndajë vetëm për punëtorët e Valës dhe Telekomit, por jo edhe për ata të Postës. Kjo me arsyetimin se Posta tashme është ndarë si njësi e veçantë.

Por Shala thotë se kjo është diskriminim pasi prej janarit deri në gusht Posta ka qenë pjesë e PTK-së.

“SPP ka provuar me mjete të dialogut dhe diskutimit të gjendet një zgjidhje ligjore, me qëllim të mbylljes se kësaj çështje, jemi injoruar nga Kryeshefi Ekzekutiv Ejup Qerimi dhe Bordi i PTK”, ka thënë Shala.

Zgjidhjen sindikalistet e shohin vetëm tek format e protestës.

“SPP sërish iu bënë thirrje të gjithë anëtarëve të saj, dhe Federatës Sindikale të PTK-së që të protestojmë dhe përdorim të gjitha masat sindikale përfshirë edhe bllokimin e procesit të punës prej sot duke filluar në ora 15:00 deri në realizimin e kërkesave të punëtorëve të kompanive tona, pasi e vetmja rruge ligjore është realizimi i të drejtës se bonusit edhe për punëtorët e PTK deri me 31 korrik 2012, e që tash janë punëtorë të njësisë se ndarë Posta e Kosovës”, thuhet në komunikatë.

Ndryshe, këto përplasje mes punëtorëve dhe menaxhmentit, po ndodhin pavarësisht faktit se Komisioni ministror për Ndërmarrje Publike ka anuluar në tërësi vendimin e menaxhmentit për bonuse. Me këtë u anulua edhe vendimi i fundit i menaxhmentit të Postë-Telekomit të Kosovës për ndarjen e bonuseve punëtorëve të operatorit “Vala” dhe ata të Telekomit. Tani e tutje, bonuset do t’u takojnë vetëm ndërmarrjeve që kanë treguar përformancë të lartë, por që paraprakisht duhet kërkesë në Ministrinë e Zhvillimit Ekonomik.

Ky vendim erdhi pas protestave të punëtorëve të Postës, njësi kjo e ndarë tashmë nga Telekomi. Menaxhmenti i PTK-së nuk iu kishte ndarë atyre bonuse me arsyetimin se tani janë njësi e veçantë. Por, punëtorët nuk i ndalën protestat as ditën e enjte.(express)

Shpërndaje.
© RAJONIPRESS