Bllokohen 200 kompani

Vendimi i fundit i Qeverisë për vendosjen e taksës në importin e çimentos i bllokoi 200 kompani kosovare dhe 2 mijë punëtorë i la pa punë. Të hënën, importuesit dhe përfaqësuesit e bizneseve nga Shqipëria e Kosova protestuan kundër kësaj takse, të cilin e quajtën të nxituar dhe pa analizë të duhur.

Vendimi i Ministrisë së Industrisë dhe të Tregtisë, me të cilin i ngriti tarifat e importit të çimentos për 35 për qind, po del të jetë me pasoja për kompanitë kosovare. Mbi 200 sosh që një javë janë bllokuar dhe si pasojë, 2 mijë punëtorë aktualisht kanë mbetur pa punë.

Të hënën, importuesit dhe përfaqësuesit e bizneseve nga Shqipëria e Kosova protestuan kundër këtij vendimi, të cilin e quajtën të nxituar dhe pa një analizë të duhur.

Importuesit kosovarë kanë kërkuar heqjen e kësaj tarife, pasi thonë se që shtatë ditë janë të bllokuara 200 firma që kanë blerë çimento në Fushë-Krujë, dhe se 2 mijë punëtorë kanë mbetur pa punë.

Në konferencën e protestës, përveç Odës Ekonomike të Kosovës dhe importuesve kosovarë, morën pjesë edhe Oda e Shqipërisë dhe drejtuesit e kompanisë nga Fushë-Kruja. Ata kundërshtuan edhe pretendimet e MTI-së se importet e çimentos nga Shqipëria po dëmtojnë prodhuesit vendorë.

Pikërisht për këtë çështje, ministrja Mimoza Kusari-Lila u kritikua si nga përfaqësuesit e biznesit, ashtu edhe nga kolegët e saj institucionalë se po e favorizon kompaninë Sharr Cem nga Hani i Elezit, duke e shkelur ligjin.

Në konferencë u tha se Sharrcemi përmbush 40 për qind të tregut, Fushë-Kruja përmbush 32 për qind, Titan Shkup përmbush 19 për qind të tregut.

Sipas kreut të Odës Ekonomike, Safet Gërxhaliu, avancimi ekonomik duhet të jetë prioritet i prioriteteve, dhe se duhet të mbrohen interesat e të gjithëve dhe jo në mënyrë selektive. Sipas tij, vendimi i marrë nga Ministria e Tregtisë është rezultat i mungesës së dialogut paraprak dhe i marrë në mënyrë ad hoc.(Express)