Bispuri: Bota nuk i ka kuptuar mirë virgjëreshat e përbetuara shqiptare

Prishtinë – E kishte shkruar librin në emër të dashurisë, revoltës e kujtimeve. Nuk brengosej se çfarë do të sillte e nesërmja. As sa gjatë do të jetonte rrëfimi nëpër raftet e bibliotekave italiane. “Për mua është një vepër dashurie dhe nuk më intereson aspak nëse do të jetë një libër i suksesshëm apo jo.

Çdo libër është vepër dashurie”, kishte thënë shkrimtarja shqiptare me nam botëror, Elvira Dones, në një intervistë të dhënë më 2007, fill pasi doli në treg libri i saj “Vergine Giurata”, i shkruar në italisht. Megjithatë, rrëfimi për fenomenin e virgjëreshave të përbetuara që jetonin nëpër vendet malore të Shqipërisë së Veriut, “pushtoi” libraritë italiane e më gjerë.

Romani të cilin Dones e quan vepër dashurie, gjashtë vjet pas lindjes, do të rikthejë vëmendjen botërore. Por kësaj here, jo nëpër libra.

Rrëfimi i protagonistes së librit të publikuar nga shtëpia prestigjioze botuese “Feltrinelli”, shpejt do të shpaloset në ekran.

Regjisorja italiane, Laura Bispuri, është ajo që ka marrë përsipër të udhëheqë ekipin që do të realizojë filmin e bazuar në romanin e shkrimtares shqiptare. Dones i ka thënë gazetës se “filmi ‘Sworn Virgin’ është bashkëprodhim mes Italisë, Francës, Belgjikës, Zvicrës, Eurimages, Shqipërisë e Kosovës. “Këto dy të fundit kanë pjesëmarrje shumë të vogla”, ka thënë Elvira Dones. E për mënyrën se si do hedhë në shirit filmik librin e saj, e ka zbuluar në një intervistë për “Kohën Ditore” vetë regjisorja Laura Bispuri.(koha)