Bislimi: Ekonomia bazament i së ardhmes

Gjilan – Zhvillimi ekonomik lokal mbetet bazament mbi të cilin mund të ndërtohet një e ardhme e sigurt për komunën dhe shtetin tonë. Prandaj, prioritet i programit të Faton Bislimit mbetet përkushtimi ndaj zhvillimit ekonomik, e veçanërisht ndaj bizneseve vendore që prodhojnë.

Prodhimi vendor është shtyllë kryesore e zhvillimit. Andaj, sot, kandidati për Kryetar Komune nga Koalicioni për Gjilanin, vizitoi kompanitë “VALI AL” Pvc dhe SOLID ku u mirëprit nga pronarët e këtyre dy kompanive prodhuese vendore tek të cilat sigurojnë të ardhura dhjetëra familje gjilanase.

“Unë mbetem i përkushtuar për të përkrahur investitorët lokal dhe për të sjellë klimë të favorshme investuese edhe për investitorë të rinj këtu në Gjilan. Unë do të jem në shërbim të sektorit privat ashtu që ky sektor i ekonomisë të gjenerojë vende të reja pune, sepse kryetari nuk krijon vende të punës, por këtë e bëjnë bizneset tona,“ tha Bislimi.

Bislimi u njoftua për së afërmi me barrierat, sfidat, dhe problemet, edhe ato infrastrukturore me të cilat ballafaqohen bizneset në Gjilan. “Në katër vitet e qeverisjes sime në Gjilan, ne do të sjellim ndryshim rrënjësor pozitiv në favor të gjilanasëve,“ përfundoi Bislimi./rajonipress/