BIPMB: “Diaspora ka qenë , gjithmonë , një krah i fortë për vendlindjen”

Në selinë e BIPBM-së, në Bujanoc, kryetari i këtij institucioni Nexhmedin ef. Saqipi, i cili njëherit është edhe Koordinator për lëndën fetare për shkollat fillore dhe të mesme të Luginës së Preshevës, priti për një vizitë pune përfaqësuesit e Bashkësisë Islame Shqiptare për Zvicër si dhe kryetarin e Shoqatës Kulturore Humanitare “Jeta“, me seli në Grenchen të Zvicrës.

Nexhmedin ef. Saqipi, të pranishmit i njoftoi për aktivitetet e Bashkësisë Islame për Preshevë, Bujanoc dhe Medvegjë, pastaj rrjedhat politike, ekonomike, kulturore e fetare në përgjithësi, duke shprehur nevojën për një bashkëpunim të mirëfilltë e institucionalë me diasporën, e cila gjithmonë ka qenë një dorë e zgjatur për ndihmë vendlindjes.

Sipas , Saqipit “Diaspora ka qenë, gjithmonë, një krah i fortë për përkrahje solidarësie qytetarëve të saj, në momentet më të vështira, por edhe tashti kjo popullatë ka nevojë për ndihmë, por nevojitet një interesim më i koordinuar me pushtetet lokale, të cilat si duket pak po tregojnë gatishmëri për një bashkëpunim më të madh në të gjitha fushat: humanitare, kulturore, fetare, sportive etj.

Gjatë këtij takimi, përfaqësuesi nga Bashkësia Islame e Zvicrës, Ferid Sulejmani, e falënderoi kryetarin e BIPMB-së, zoti Saqipi, për mikpritjen dhe interesimin e shtuar për bashkëpunim me qytetarët e Luginës, të cilët punojnë dhe veprojnë në Zvicër. Sulejmani, gjithashtu, shtoi se në Zvicër e më gjerë, jetojnë dhe veprojnë një numër i madh bashkatdhetarësh nga Lugina, të cilët kanë nevojë për një bashkëpunim më të mirë me institucionet vendore dhe të jenë në kontakt dhe të informuar për të gjitha fushat e veprimtarisë, e në veçanti në edukimin dhe emancipimin fetar në diasporë, gjithashtu e njoftoi edhe për organizimin e Shoqatës Kulturore Humanitare “Jeta“ , dhe kontributin e saj në grumbullimin dhe shpërndarjen e ndihmave për vendlindjen.
Në fund të këtij takimi, Nexhmedin ef.

Saqipi dhe Ferid Sulejmani, u dakorduan, që në të ardhmen, të shtojnë edhe më shumë bashkëpunimin në fushat e ndryshme të aktiviteteve fetare, kulturore, humanitare dhe informative, njofton Qendra Informative e BIPBM, me seli në Bujanoc.