Biblioteka e qytetit të mbajë emrin e Beqir Musliut

Gjilan – Poet,shkrimtar,gazetarë,dhe familjar e kanë përkujtuar ditëlindjen e Beqir Musliut njërit nga shkrimtarët më të mëdhenj të letrave shqipe.

Beqir Musliu ka lindur në vitin 1945 dhe ka vdekur më 24 qershor 1996. Në ditëlindjen e tij është përkujtuar e nderuar njeriu që ka lënë gjurmë të pashlyera dhe i ka dhënë kuptim dhe avancim krijimtarisë së Anamoravës dhe më gjerë.

Sabit Rrustemi nga Ars Club “Beqir Musliu” ka thënë se Beqir Musliu do të jetë i pranishëm kudo dhe kurdoherë sepse veprat e tij janë të pavdekshme. Rrustemi ka thënë se monografia më e mirë e Gjilanit gjendet në shkrimet e Beqir Musliut.

Rrustemi tha se nëse mendohet të nderohet vepra dhe krijimtaria e Beqir Musliut, atëherë këtë më së miri mund ta bëjnë me vendosjen e emrit të Bibliotekës së qytetit e cila po ndërtohet tash së fundit. Rrustemi akoma nuk ka hequr dorë nga botimi i dorëshkrimeve të Beqir Musliut,por tha se ato marrin kohë.

Edhe profesor Faik Shkodra tha se “Beqa ynë” ishte një krijues që nuk donte të ishte peng i askujt. “Ai jetoj e shkroi ashtu siç deshi vet dhe nuk u gjunjëzua para asnjë sfide e pushteti” tha Shkodra.

Edhe, Musa Sabedini kryetar i Klubit të Gazetarëve “Beqir Musliu ka thënë se ky klub me plotë krenari dhe në mënyrë dinjitoze ka arritur që për 13 vite ta bartë në kontestin më pozitiv emrin e krijuesit më të madh të letrave shqipe. Sabedini ka shtuar se institucionet duhet të zgjohen nga gjumi dhe më seriozisht ta trajtojnë tërë atë kontribut që “Beqa i madh” e ka dhënë për letërsinë shqipe e në veçanti për rajonin e Anamoravës .

Ndryshe asnjë zyrtar komunal apo përgjegjës nga drejtoria e kulturës nuk e ka parë të udhës që të vendos kurora lulesh tek varri i Beqir Musliut.

Beqir Musliu është prezantuar thuaja në të gjitha antologjitë e shkrimtarëve shqiptarë të kohës së tij e më vonë. Punimet e tij janë përkthyer në gjuhën frënge, angleze, spanjolle, italiane, arabe, gjermane, hungareze, rumune, turke, sllovake, maqedonase, sllovene, serbe dhe kroate./rajonipress/