Berisha debuton te Lazio kundër Apollonit

Portieri i Kombëtares së Shqipërisë, Etrit Berisha, pritet këtë javë të debutojë në portën e skuadrës së Lazios. Mediumet italiane të martën kanë bërë të ditur se Berisha do të jetë titullar te Lazio në ndeshjen kundër Apollonit.

Kjo ndeshje i takon Grupit J të Europa League dhe zhvillohet të enjten (21:05). “Berisha do të debutojë te Lazio kundër Apollonit. Ai do ta zërë vendin e Federico Marchettit, i cili deri më tani është aktivizuar në 15 ndeshje këtë edicion”, shkruan “Repubblica”.

Berisha 24-vjeçar, gjatë kësaj vere u transferua te skuadra e Lazios nga Kalmari. Pas tri ndeshjeve në Europa League, Lazio zë pozitën e dytë në grup me pesë pikë, dy më pak se Trabzonspori që i prin tabelës. Pos Berishës, në këtë ndeshje pritet të aktivizohet edhe mesfushori Lorik Cana.