Beqiri e quan të gabueshëm koalicionin AAK-LDD

Prishtinë – Sekretari i përgjithshëm i Lidhjes Demokratike të Kosovës (LDK), Ismet Beqiri, ka vlerësuar se Lidhja Demokratike e Dardanisë (LDD) më mirë do të akomodohej në këtë parti sesa në Aleancën për Ardhmërinë e Kosovës (AAK) e Ramush Haradinajt.

Beqiri në një intervistë për “Epokën e Re”, theksoi se LDD-ja do të akomodohej shumë më mirë në LDK dhe kjo sipas tij është e padiskutueshme.

“Vetë fakti se ata njerëz kanë dalë nga LDK-ja dhe deri dje kanë qenë votues të LDK-së, është shumë e qartë se ata do ta gjenin veten më mirë në kuadër të koalicionit me ne”, ka deklaruar Beqiri, duke shtuar se nga gjendja e tanishme në terren vendimi i LDD-së për t’u bashkuar me AAK-në ka qenë i gabueshëm.

Beqiri edhe një herë i ka bërë thirrje anëtarësisë së LDD-së t’i bashkohet LDK-së.

“Siç e dini, pas arritjes së koalicionit AAK – LDD ne i kemi bërë thirrje anëtarësisë së LDD-së t’i bashkohet LDK-së. Në këtë drejtim LDK-ja është e hapur për të gjithë ata (dardanët) që dëshirojnë të jenë pjesë e kësaj partie. Dyert e LDK-së janë të hapura për anëtarësinë e LDD-së, jo vetëm të saj”, është shprehur Beqiri. Sipas Beqirit, koha do ta dëshmojë nëse LDD-ja do ta ruajë subjektivitetin e saj politik.

Sekretari i përgjithshëm i LDK-së ka folur edhe për çështjen e koalicioneve të ardhshme për bashkëqeverisje.

Beqiri nuk e ka përjashtuar mundësinë që në të ardhmen të bashkëqeverisin me partneren e dikurshme, PDK-në.

Shpërndaje.
© RAJONIPRESS