Beqiraj nuk shënon, por lavdërohet nga trajneri

Sulmuesi kosovar, Fatos Beqiraj, ka luajtur 90 minuta për Dinamon e Zagrebit që fitoi 3:0 kundër Slaven Belupos. Takimi ishte i vlefshëm për javën e 22-të të kampionatit të Kroacisë në futboll dhe u luajt të shtunën mbrëma.

Paraqitja e Beqirajt u vlerësua lart, ani pse ai nuk ia doli të shënojë. Futbollisti pejan kreu shumicën e punës në golin e shënuar në minutën e 90-të nga Josio Pivariq. Golin e dytë për Dinamon e shënoi mesfushori Arijan Ademi. Ai realizoi gol të bukur në minutën e 51-të. “Më vjen keq që Beqiraj nuk shënoi gol dhe t’u japë fund ndeshjeve pa gola. Por është shumë e rëndësishme që sulmuesi edhe kur nuk shënon gol, luan mirë, është i vlefshëm për ekipin. I tillë ishte sot Beqiraj”, ka thënë trajneri i Dinamos, Krunoslav Jurqiq. Beqiraj nuk ka shënuar në tetë ndeshjet e fundit zyrtare. Së fundi ka realizuar më 17 nëntor të vitit të kaluar. Këtë edicion në të gjitha garat ka realizuar pesë gola në 30 paraqitje.

Për Ademin, goli i shënuar të shtunën ishte i dyti këtë edicion. “Jam i lumtur pasi vërtet kemi luajtur mirë, kemi dominuar plotësisht gjatë 90 minutave dhe me plot meritë fituam tri pikë të reja. Jam i lumtur edhe për golin. Tani po kam më shumë raste, pasi luaj afër portës. Po më përshtatet pozita ofensive, pas sulmuesve”, ka thënë Ademi. Dinamo i prin klasifikimit me 50 pikë.(koha)