Beqaj: PDK-ja po pavarësohet nga Hashim Thaçi

Njohësi i zhvillimeve politike Behlul Beqaj ka thënë se mos reagimi i deritanishëm i opozitës është njëri prej faktorëve pse gjendja në Kosovë nuk është e mirë.

Beqaj, në emisionin “Dossier D” në RTV Dukagjini, ka thënë se vendimi i opozitës për t’i dërguar letër Mogherinit është një fillim i këndelljes me qëllim të ruajtes së sovranitetit të Kosovës.

Beqaj tha se është për të ardhur keq se si persona të caktuar po manipulojnë me shqiptarët e Luginës së Preshevës.

“Është me të vërtet për të ardhur keq kur një personalitet dëshiron ta shpëtojë veten nga kthetrat e veprimeve nga e kaluara, duke manipuluar me vullnetin politik të shqiptarëve të Luginës së Preshevës”, tha Beqaj, duke thënë se manipulimi po bëhet nga një person i vetëm e jo nga klasa politike në Kosovë.

Njohësi i zhvillimeve politike ka thënë se Kadri Veseli sot ka dhënë indikacione se PDK-ja po pavarësohet nga Hashim Thaçi.

Ai ka thënë se opozita edhe mund të përfshihet më një ekip uniteti, me qëllim që Thaçi të margjinalizohej.

“Opozita mundë të përfshihet në një ekip uniteti, duke lënë Limajn si bartës të procesit, por duke ia hequr Thaçit kompetencat, apo duke i lënë atij vetëm kompetenca ceremoniale”, tha ai, përcjell Telegrafi.

Zgjidhja e problemit me Serbinë sipas Beqajt nuk mund të bëhet duke ndryshuar territore, sepse pjesa më e madhe e popullsisë serbe në Kosovë nuk është në veri por në jug.

“Pas korrigjimit të kufijve do të kemi probleme më të mëdha, pasi në Kosovë do të mbesin 90 – 100 mijë serb”, duke thënë se koncepti është tërësisht i gabuar./Telegrafi/