Beqaj humb betejën me naftëtarët

Ministri i Financave, Besim Beqaj, më 2 shkurt 2014, kishte dhënë ultimatum që të gjitha pikat e karburanteve në territorin e Kosovës të fiskalizohen dhe pas kësaj date të gjithë ata të cilët nuk kanë pajisje të tillë të gjobiten.

Por “kërcënimi” nuk zgjati shumë dhe më 21 mars të këtij viti, Beqaj u dorëzua përballë presionit të madh të naftëtarëve.

Ai kishte thirrur në takim përfaqësuesit e Shoqatës së Naftëtarëve, ATK-së, Odës Ekonomike Amerikane dhe Odës Ekonomike të Kosovës për ta kumtuar lajmin se inspektorët e ATK-së nuk do të shqiptojnë më gjoba, deri në afat të pacaktuar.

Kjo tregon se naftëtarët milionerë kanë shtrirë pushtetin e tyre edhe në politikë. Ata kanë krijuar lidhje të fuqishme me politikanë dhe ligjvënësit.

Tani ata kanë lidhje të forta me ministra dhe deputetë brenda institucioneve të Kosovës. Kjo lidhje e “fortë” e tyre me pushtetin dëshmohet me faktin se ministri i Financave, Besim Beqaj, këtë vendim e kishte hedhur poshtë duke iu hapur rrugë atyre që të formojnë një operator të dytë për fiskalizim.