Beogradi s’heq dorë nga Asociacioni

Kryeministri i Kosovës, Isa Mustafa, dhe ai i Serbisë, Aleksandër Vuçiq, do të takohen edhe sot në Bruksel, në përpjekje për të gjetur marrëveshje për katër çështjet e hapura ndërmjet dy shteteve, telekomin, energjetikën, Asociacionin e Komunave Serbe dhe të ashtuquajturin “Parku i paqes” në Mitrovicë.Derisa zyrtarët në Prishtinë po presin që nga kjo valë bisedimesh të finalizohet çështja e prefiksit të Kosovës dhe ajo e energjetikës, në Beograd pritjet janë më të mëdha.

Ata presin që sot të detajohen modalitetet që funksionalizojnë Asociacionin e Komunave Serbe, që serbët e quajnë “Zajednica”, madje edhe me fuqi ekzekutive.

Ndërsa analistët janë skeptikë se me Serbinë do të gjendet një zgjidhje e kënaqshme për çështjet e hapura.

Kryeministri, Isa Mustafa, ka njoftuar se të hënën do të takohet me Vuçiqin, ndërsa ka bërë me dije se Asociacioni i Komunave, energjia dhe telekomi janë temat që do të vazhdohen të jenë në tavolinë, të njëjtat që i kanë diskutuar javën e kaluar, por pa sukses.

Ndryshe Marko Gjuriq, drejtor i Zyrës së Qeverisë së Serbisë për Kosovën, ka thënë se “shqiptarët duhet ta kenë parasysh se Serbia nuk do të heqë dorë nga qëllimi që Asociacioni i Komunave Serbe të ketë kompetenca ekzekutive”.

“Ne jemi duke hyrë në bisedime për të zgjidhur dhe për ta detyruar Prishtinën t’i përmbushë obligimet e saj që dalin nga Traktati i Brukselit, i cili është formimi i një komuniteti të fortë të komunave serbe”, ka thënë Gjuriq për mediet serbe. /zeri/