Behrami: Vuajtëm ndaj Arsenalit

Valon Behrami thotë se Napoli vuajti në ndeshje me Arsenalin, të cilën e humbi me rezultat 2-0, në ndeshjen e vlefshme për xhiron e dytë të fazës së grupeve të Ligës së Kampionëve.

Mirëpo, mesfushori kosovar është i bindur se skuadra italiane do t’u kthehet fitoreve sa më shpejt të jetë e mundur, ndoshta që nga fundjava.

“Për momentin nuk ka ndryshuar asgjë. Kemi humbur kundër një skuadre të madhe dhe kjo është e kuptueshme. Këtë mesjavë e pamë që ka skuadra që kanë shpenzuar miliona dhe që mund të humbin në shtëpi. Mendoj se është normale të vuash ndaj një skuadre mjaft të fort në udhëtim”, deklaroi fillimisht përfaqësuesi zviceran për Sky Sport.

“Zhgënjimi për humbjen ekziston, por nuk jemi të preokupuar. Të gjitha ndeshjet tregojnë diçka dhe ne duhet ta shikojmë ndeshjen për ta kuptuar se ku kemi gabuar dhe të mos i përsërisim gabimet në të ardhmen. Nëse i përsërisim, do të thotë se nuk kemi kuptuar asgjë”, përfundoi Behrami.