Behgjet Pacolli nënshkruan marrëveshje qindra milionëshe në SHBA për rindërtimin e qytetit historik të Mosulit

Biznesmeni dhe ish-presidenti i Kosovës, Behgjet Pacolli, ka bërë të ditur se ka nënshkruar një marrëveshje me vlerë disa qindra milionë dollarë amerikanë për rindërtimin e një pjese të qytetit historik të Mosulit në Irak.

Sipas Pacollit, marrëveshja u nënshkrua në emër të kompanisë së përbashkët JV Mabetex Veritas të Michiganit, gjatë Samitit të Biznesit të Nivelit të Lartë SHBA-Irak, të mbajtur në Dhomën e Tregtisë së Shteteve të Bashkuara në Uashington, D.C., ku u finalizuan investime dhe kontrata me vlerë qindra miliarda dollarë.

Ceremonia e nënshkrimit u zhvillua në prani të Kryeministrit të Irakut, Ali Al-Zaidi, Sekretarit amerikan të Energjisë, Chris Wright, si dhe Guvernatorit të Nineveh, Abdul Qader Al-Dakhil. Projekti parasheh rindërtimin e infrastrukturës urbane të një pjese të Mosulit, duke përfshirë objekte banimi, hapësira gastronomike, infrastrukturë publike dhe zhvillimin e mjedisit urban.

Pacolli e cilësoi këtë kontratë si një tjetër dëshmi të besimit ndërkombëtar ndaj ekspertizës së kompanisë së tij në realizimin e projekteve të mëdha infrastrukturore. Ai theksoi se angazhimi i JV Mabetex Veritas synon jo vetëm rindërtimin fizik të qytetit, por edhe krijimin e vendeve të reja të punës, rigjallërimin e komuniteteve dhe nxitjen e zhvillimit të qëndrueshëm përmes bashkëpunimit ekonomik ndërmjet Shteteve të Bashkuara dhe Irakut.

Ky projekt konsiderohet një ndër investimet më të rëndësishme të kompanisë në Lindjen e Mesme dhe një hap i ri në zgjerimin e pranisë së saj në tregjet ndërkombëtare të ndërtimit dhe zhvillimit urban./rajonipress/