“Bashkimi kombëtar” po krijon ndasi!

Edi Rama foli në Beograd për Kosovën. Tha se Trepça është pasuri e këtij vendi dhe se Serbia duhet ta kuptoj këtë gjë. Por, deklaratat e tij, sado që e thumbuan homologun e tij serb, Aleksandër Vuçiq, nuk u pritet mirë nga një pjesë e politikanëve dhe opinionistëve në Kosovë. Megjithatë, edhe për ta pati kundërpërgjigje, si brenda në Kosovë, ashtu edhe në Shqipëri.

Debati u ashpërsua nga deklarata e Ministrit të Jashtëm, Enver Hoxhaj, dhënë një televizioni në Maqedoni.

“Kosova është shtet i pavarur sikurse çdo shtet tjetër në rajon ndërsa Shqipëria nuk është një aktor global sikurse SHBA-ja apo BE-ja, prandaj ne në raport mes Kosovës dhe Serbisë natyrisht që kërkojmë mbështetje amerikane, dhe natyrisht që kërkojmë mbështetje evropiane, meqë këta kanë edhe instrumente që të ushtrojnë ndikim. Ndërsa, çdo bashkëpunim që mund ta ketë Shqipëria në rrafshin ekonomik, është çështje bilaterale mes Shqipërisë dhe Serbisë”, kishte deklaruar Hoxhaj.

Ishte gazetari e publicisti Blendi Fevziu nga Shqipëria, s’u pajtua me ketë qëndrim. Ai konsideroi se ideja për krijimin e dy kombeve të ndryshme është tejet e rrezikshme.

“Por, drejtuesit e Republikës së Kosovës, duhet ta dinë që ka dy shtete, shqiptare, por ka vetëm një komb shqiptar. Një komb që përfshin edhe qindra mijëra shqiptarë që jetojnë sot në Maqedoni, Mal të Zi, Presheve, Medvegjë e Bujanovc. Një komb, identiteti dhe historia e të cilit nuk nis as në 1989 dhe as në 2008, por disa mijëra vjet më parë. Tentativa për te krijuar dy kombe të ndryshme nuk është e dështuar, por tejet e rrezikshme”, ka thënë ai. /Tribuna Channel/