Bashkimi i Shqipërisë me Kosovën, hapi i parë

Partia për Drejtësi, Integrim dhe Unitet, ka mbajtur në “Qafë Botë”, në tubim në përkujtim të gjenocidit ndaj popullsisë çame. Gjatë tubimit me rastin e javës së Kulturës dhe Historisë së Çamërisë, kreu i PDIU-së, Shpëtim Idrizi, u shpreh se “çështja çame do të zgjidhet me anëtarësimin e Shqipërisë në BE”.

Idrizi tha pavarësisht se gjatë genocidit “20% e popullatës u shfaros”, nënvizoi se “kurrë nuk ka mundi e keqja si komunitet”.

“Këtu nga kufiri artificial mes shqiptarëve. U kujtojmë se nuk kemi synim ndryshimin e kufijve, ne nuk jemi kundër Evropës. Ne do të kthehemi në Çamëri. Çdo hap i Shqipërisë në BE është hap drejtë lirisë. Brenda BE-së janë të gjitha shanset për të zgjidhur këtë problem”, u shpreh kreu i PDIU-së.

Gjatë tubimit, ka mbajtur fjalim edhe kreu i Lëvizjes Vetëvendosje, Albin Kurti. Ai u shpreh se Çamëria është pjesë e kombit shqiptar dhe se një ditë ajo do të jetë e bashkuar me pjesën tjetër. Bashkimi, tha ai është e vetmja rrugë për të zmbrapsur fqinjët nga qëllimet e tyre të errëta.

“Mos harroni që Greqia e sheh Shqipërinë të ndarë nga Kosova dhe dëshiron të kafshojë jugun. Edhe Serbia e shikon të ndarë dhe kërkon të kafshojë veriun. Bashkimi është kushti për zmbrapsjen e çdo ambicie hegjemonistë. Por bashkimi i Shqipërisë me Kosovën është vetëm hapi i parë për bashkimin e kombit”, u shpreh Kurti duke shtuar se pjesë e saj duhet të bëhet “Ulqini, Mitrovica, Bujanoci dhe Shkupi dhe të krijohet një ushtri e fuqishme shqiptare që na mbron dhe ekonomi prodhuese që na ushqen”.(Zeri)