Bashkëpunim institucional për avancimin e të drejtave të njeriut dhe barazisë gjinore në sektorin e sigurisë

Kamenicë – Në kuadër të fuqizimit të bashkëpunimit ndërinstitucional, në Njësinë Komunale për të Drejtat e Njeriut është zhvilluar një takim me përfaqësuese të Ministrisë së Mbrojtjes, me fokus promovimin e të drejtave të njeriut dhe barazisë gjinore në sektorin e sigurisë.

Delegacioni nga niveli qendror, i përbërë nga Halime Morina Lupçi, shefe e Njësisë për të Drejtat e Njeriut dhe Barazi Gjinore, dhe Qamile Thaqi, zyrtare për të drejtat e njeriut, u prit nga përfaqësueset lokale, Nazmije Demolli Kastrati, koordinatore e NJKDNJ-së, dhe Kosovare Maroca Berisha, zyrtare për barazi gjinore, kthim dhe riintegrim.

Gjatë takimit u diskutua për rëndësinë e koordinimit ndërmjet institucioneve qendrore dhe lokale në avancimin e të drejtave të njeriut, si dhe për rolin e barazisë gjinore në sektorin e sigurisë. Një theks i veçantë iu kushtua prezantimit të fushatës së rekrutimit për Forcën e Sigurisë së Kosovës (FSK), e cila synon të informojë dhe të inkurajojë të rinjtë për t’u bërë pjesë e këtij institucioni.

Në këtë kuadër, u nënvizua rëndësia e rritjes së përfaqësimit të grave në sektorin e sigurisë, duke inkurajuar veçanërisht vajzat që të aplikojnë dhe të kontribuojnë në shërbim të vendit. Po ashtu, pjesëmarrësit shpërndanë materiale informuese me qëllim rritjen endërgjegjësimit dhe nxitjen e angazhimit aktiv të të rinjve.

Ky aktivitet është pjesë e një serie vizitash që Njësia për të Drejtat e Njeriut dhe Barazi Gjinore në Ministrinë e Mbrojtjes po realizon nëpër komuna, me synim forcimin e bashkëpunimit institucional dhe promovimin e barazisë gjinore në institucionet e sigurisë./rajonipress/