Bashkëatdhetari Muhamet Fazliu dhuron autoambulancë për QKMF-në në Kamenicë

Kamenicë – Në Komunën e Kamenicës është bërë sot dorëzimi i një autoambulance të dhuruar nga bashkëatdhetari ynë, Muhamet Fazliu, në funksion të përmirësimit të shërbimeve shëndetësore lokale.

Ky donacion u realizua pas një koordinimi të ngushtë ndërmjet Drejtorit të Shëndetësisë, Besart Kryeziu dhe donatorit Muhamet Fazliu.

Autoambulanca iu dorëzua Drejtorit të QKMF-së në Kamenicë, Latif Sylaj, me qëllim të rritjes së kapaciteteve për ndërhyrje emergjente dhe përmirësimit të efikasitetit në ofrimin e kujdesit shëndetësor për qytetarët.

Në ceremoninë e dorëzimit mori pjesë edhe Kryetari i Komunës, Kadri Rahimaj ku me këtë rast shprehu mirënjohjen e tij për këtë donacion.

“Falënderoj sinqerisht bashkëatdhetarin Muhamet Fazliu për këtë kontribut shumë të rëndësishëm për komunën tonë. Mbështetja e vazhdueshme e diasporës është dëshmi e lidhjes së fortë me vendlindjen dhe një ndihmë konkrete për përmirësimin e shërbimeve për qytetarët tanë’’, th Rahimaj.

Ndërkaq, Drejtori i Shëndetësisë, Besart Kryeziu, theksoi rëndësinë e këtij donacioni për sektorin shëndetësor duke vlerësuar se kjo autoambulancë do të ndikojë drejtpërdrejt në rritjen e cilësisë së shërbimeve emergjente dhe në reagimin më të shpejtë ndaj rasteve që kërkojnë ndërhyrje urgjente.

Ky donacion përfaqëson një shembull domethënës të kontributit të vazhdueshëm të bashkëatdhetarëve për vendlindjen e tyre. Institucionet komunale shprehin mirënjohje të thellë për këtë akt human dhe solidaritetin e treguar./rajonipress/