Bashës nuk i pritet “derbi i çmendur”

Prishtinë – Mesfushorit kosovar, Migjen Basha, i mungon përvoja në Serie A. Ai nuk ka luajtur as edhe një minutë të vetëm në elitën e futbollit italian, ndonëse ka plot tetë vjet që bën karrierë me ekipe të ndryshme në Itali.

Për më keq, për gjithë këto vite ai nuk përjetojë emocionet as edhe të ndonjë derbi të vërtetë.

Por, tash ai ka rastin që këtë vit të përjetojë një emocion të tillë, atë që dhuron njëri prej derbive më të zjarrtë lokal në Itali: Torino – Juventus.

Ai thotë se do të bëjë të pamundurën për të qenë titullar në derbin e qytetit të Torninos, që në Itali njihet si “Derby della Mole” (Derbi i çmendur).

Basha 25-vjeçar i ka ndihmuar shumë Torinos që të kthehet në elitën e futbollit italian. Me këtë skuadër, stinorin e shkuar në Serie B, shkëlqeu ai dhe skuadra e tij (Koha).