Basha merr ‘dritën e gjelbër’ për Shqipërinë

Duket se ëndrra e Migjen Bashës më në fund do të realizohet. Trupi i tij do ta ndjejë në një ndeshje futbolli fanellën ‘kuqezi’ të Kombëtares shqiptare. Mesfushori kosovar është lënë i lirë nga Federata Zvicerane e Futbollit për të zhvilluar ndeshje me Shqipërinë.

Të kujtojmë se ishin zviceranët ata që bllokuan tash e disa vjet inkuadrimin e Migjenit me ‘kuqezinjtë’, pasi ai paraprakisht kishte zhvilluar ndeshje me skuadrën U21 të zviceranëve.

Megjithatë, burime të gazetës brenda Federatës Shqiptare të Futbollit kanë bërë të ditur se të premten (dje), Migjenit i është lëshuar vendimi që ia mundëson atij të luajë me Shqipërinë, qysh në takimin e radhës kundër Norvegjisë.

Sipas tyre, Migjeni është lënë i lirë nga Zvicra për ta përfaqësuar Shqipërinë, ndërsa gjithë ky përshpejtim procedure ka ardhur edhe për shkak të Mërgim Brahimit, i cili kohë më parë vendosi që nga Shqipëria të kalonte te Përfaqësuesja zvicerane. Gjithsesi, një lajm të tillë ka hezituar ta konfirmojë shefi i skuadrave Kombëtare te Shqipëria, Redi Jupi. Në një prononcim për gazetën ‘Tribuna’, Jupi ka deklaruar se ende nuk mund të dalin me një prononcim zyrtar.

“Zyrtarisht s’kemi asnjë prononcim për këtë çështje. Sa më pak që të flitet, aq më mirë do të jetë. Ju doni të mbushni letra, ne duam t’i nxjerrim lojtarët në fushë. Për momentin, nuk punojmë në të njëjtin drejtim”, ka bërë të ditur Jupi, duke mos dashur lënë pezull këtë çështje.