Banorët e Stubllës kërkojnë rrugë dhe ujësjellës

Gjilan – Në fshatin Stubëll e Epërme të Komunës së Vitisë është mbajtur diskutimi publik me banorët e këtij fshati lidhur me procesin e planifikimit të buxhetit për vitin 2013-2015.

Nga ky takim banorët kërkuan që Komuna të investoj më shumë në këtë fshat ,në veçanti ata i kanë dhënë prioritet hapjes së një rruge alternative me arsyetimin se kjo do të lehtësonte qarkullimin e lirë dhe të sigurte të banorëve.

Stubllanasit gjithashtu theksuan se si problem kyç është edhe mungesa e ujit pasi sipas tyre banorët po shpenzojnë shuma të mëdha parash në hapjen e puseve të cilat shumë herë dështojnë pasi që nuk ka ujë të mjaftueshëm.

Abdyl Bajrami nënkryetar i komunës tha se Komuna do t`i merr parasysh këto sugjerime dhe se do të shikohen mundësitë që përmes buxhetit Komunal, por edhe donatorëve të ndryshëm të investohet në fshatin Stubëll të Epërme.

Ndërsa Islam Jashari Drejtori i Ekonomisë, Financave dhe Zhvillimit i njoftoj ata lidhur me procesin e planifikimit të buxhetit për vitin 2013-2015. Ky takim është organizuar nga Institucionet Komunale të Vitisë, konkretisht Drejtoria për Ekonomi, Financa dhe Zhvillim në bashkëpunim me organizatën jo qeveritare ELITA-Viti dhe në mbështetje të fondacionit për Shoqëri të hapur KFOS ndërsa është pjesë e planit të zyrës për Informim Publik ku parashihen të mbahen 10 takimet të tilla në fshatrat e ndryshme të Komunës së Vitisë. /rajonipress/