Banorët e Stanqiqit të shqetësuar për gjendjen e rëndë të rrugës, kërkojnë ndihmën e komunës

Gjilan – Shena Bajrami dhe Faruk Ymeri thonë se disa hera kanë shkuar në drejtorinë e shërbimeve publike dhe janë ankuar, por kurrë nuk kanë marrë përgjigje. Është e mjerueshme që Stanqiqi të bojkotohet dhe anashkalohet nga Komuna shprehen ata.

Faruk Ymeri dhe Sherna Bajrami thanë për rajonipress se kanë bërë disa herë kërkesë në Drejtorinë e Shërbimeve Publike, por askush deri tani nuk e ka vizituar fshatin Stanqiq për ta parë gjendjen e rëndë të rrugës.

“Rruga është dëmtuar shumë dhe pothuajse është bërë e pakalueshme për vetura. Jemi fshat kufitar që jetohet me shumë vështirësi atje. Disa herë kam qen tek shërbimet publike, por s`ka asnjë reagim prej tyre. Alban Hyseni duhet të zgjohet nga gjumi dhe të dali në teren sepse edhe ne jemi Kosovë” tha Shena Bajrami.

Faruk Ymeri ndërkaq thotë se brezi kufitar nuk duhet të poshtërohet në këtë mënyrë. “Stanqiqi në të gjitha kohërat ka dhënë kontribut dhe ka ndihmuar luftën në Kosovë, Maqedoni e Luginë, kurse tani ka mbetur i izoluar dhe në bllokim total” thotë Ymeri./rajonipress/