Gjilan – Pavarësisht se u mirëprit lajmi për rregullimin e infrastrukturës rrugore, banorët e lagjes “Fidanishte”, vazhdojnë të sfidohen. Sipas tyre rruga “Enver Miftari” mbetet akoma e papërfunduar, ndërsa atyre u shkaktohen telashe të mëdha në lëvizje dhe qarkullim.
Qytetarët e kësaj zone, thonë se kjo rrugë duhet ë përfundojë me kohë dhe se komuna duhet të ndajë mjetet shtesë për të përfunduar punimet.
Ata ankohen se kanë vështirësi në qarkullim si dhe vazhdojnë të dëmtohen si rezultat i stërzgjatjes së punimeve dhe menaxhimit jo të mirë të punimeve.
Shqetësimet e tyre kanë të bëjnë me lëvizjen, punimet në vendosjen e infrastrukturës nëntokësore, ndërhyrjet e disa ndërtuesve në pasuri publike si dhe ndriçimin e papërshtatshëm publik.
“Trotuarët nuk janë funksional. Këmbësorët ndajnë asfaltin me ngasësit e mjeteve motorike. Derisa këta të fundit, në mënyrë të pa përgjegjshëm, e kanë shndërruar rrugën në vend parkim. Rruga e asfaltuar ndahet edhe me shportat e mbeturinave. Kjo çka po ndodh është e pa-pranueshme. Nuk e pranojmë këtë kualitet të investimeve. Infrastruktura nëntokësore është gjithashtu jo e duhura, thuajse në çdo metër është ndërtuar nga një puset, e me gunga-gropa”, theksojnë banorët.
Të njëjtit thonë se kështu siç po shkon, do të shfrytëzojnë mekanizmat qytetarë për të sfiduar pranimin teknik të projektit.
Sipas referimit në kontratë, realizimi i projektit është dashur të përfundoj vitin e kaluar. Megjithatë i njëjti ngelet i papërfunduar dhe tani për tani punimet nuk janë duke vazhduar për shkak se komuna nuk ka ndarë mjetet shtesë për të përfunduar punimet./rajonipress/
