Banorët e brezit kufitar në Karaçevë të Poshtme me kërkesë publike ndaj kryeministrit Kurti

Kamenicë – Banorët e brezit kufitar në Karaçevë të Poshtme të Kamenicës kanë shprehur pakënaqësinë e tyre lidhur me përfaqësimin e Anamoravës në Qeverinë e Republikës së Kosovës. Përmes një reagimi publik, Selver Lenjani, në emër të banorëve të kësaj zone, ka adresuar një kërkesë ndaj kryeministrit Albin Kurti.

Sipas tij, emërimi i kabinetit qeveritar pa asnjë ministër nga Kamenica, Gjilani apo Viti ka shkaktuar zhgënjim të thellë në këtë rajon. “Votat i morët në Kamenicë, në Gjilan dhe në gjithë Anamoravën, por në përbërjen e Qeverisë nuk u përfshi asnjë përfaqësues nga ky rajon,” thuhet në reagimin e Lenjanit.

Në reagim thuhet se banorët e brezit kufitar ndihen të anashkaluar, pavarësisht mbështetjes elektorale që i kanë dhënë shumicës qeverisëse. Ata vlerësojnë se në Anamoravë ka kuadro të përgatitura që do të mund të përfaqësonin denjësisht rajonin në nivel qendror.

Në reagim përmendet edhe ndërprerja e projektit të autostradës Lipjan-Gjilan-Dheu i Bardhë, për të cilin banorët thonë se mbetet një nga premtimet e parealizuara që ka ndikuar drejtpërdrejt në zhvillimin ekonomik të zonës. Po ashtu, kërkohet më shumë vëmendje institucionale për projektet infrastrukturore dhe zhvillimore në Anamoravë.

Në mesazhin e tyre, banorët rikujtojnë sakrificën e popullit të Kosovës për liri dhe pavarësi, duke theksuar rëndësinë e ruajtjes së vlerave shtetformuese dhe të partneritetit me Shtetet e Bashkuara të Amerikës. Ata shprehin mirënjohje për kontributin e të gjithë atyre që kanë dhënë jetën për lirinë e vendit, duke kërkuar që institucionet aktuale të punojnë në frymën e përgjegjësisë dhe përfaqësimit të barabartë.

Reagimi i banorëve të Karaçevës së Poshtme rikthen në vëmendje debatin për balancën rajonale në institucionet qendrore dhe nevojën për përfshirje më të gjerë të Anamoravës në vendimmarrje./rajonipress/