Balikesirspor interesohet për Harbuzin

Skuadra turke Balikesirspor ka shprehur interesim që gjatë kësaj vere ta transferojë sulmuesin kosovar Labinot Harbuzin, ka bërë të ditur të hënën “haber3.com”.

Kryetari i klubit që garon në Kategorinë e Dytë të Turqisë, Tuna Akturk, ka konfirmuar se klubi është i interesuar për tre lojtarë të rinj, por nuk ka dashur të flas me emra. “Po është e vërtetë që jemi të interesuar për tre lojtarë të rinj dhe gjatë ditëve të ardhshme do të qartësohen gjërat”, ka thënë Akturk. Harbuzi 27-vjeçar është lojtar i skuadrës suedeze Prespa Birlik.

Javë më parë ka qenë në prova edhe te skuadra spanjolle Real Valladolid, por nuk ka arritur t’i bindë drejtuesit e skuadrës që garon në La Liga të Spanjës.

Harbuzi më herët ka luajtur edhe për Syrianskan, Malmon, Feynoordin, Excelsior Rotterdam, si dhe për dy skuadrat turke, Gençlerbirligi e Manisaspor.