Avni Kastrati “ia fal” pronën komunale nipit

“Daja më i mirë në Kosovë”. Kështu mund të cilësohet kryetari i Komunës së Mitrovicës, Avni Kastrati.

Duke shfrytëzuar pozitën që ka, i pari i Mitrovicës ia ka mundësuar nipit të tij, Armend Hasani, që t’i marrë në shfrytëzim rreth shtatëqind metra katrorë pronë komunale, në të cilën djali i motrës së kryetarit ka ngritur një restorant relativisht të madh, shkruan “Zëri”.

Për dhjetë vjetët e ardhshme, Hasani, që tashmë menaxhon restorantin “Riverside Caffe”, do t’i paguajë Komunës së Mitrovicës qira mujore mbi treqind euro, ndërsa do të shfrytëzojë një hapësirë relativisht të madhe përskaj lumit Ibër.

Gjithçka është bërë duke nxjerrë një vendim për dhënien në shërbim të tri pronave të ndryshme komunale, njëra nga të cilat i është “dhuruar” pikërisht djalit të motrës së kryetarit.

Drejtuesit e Komunës së Mitrovicës e pranojnë se kryetari i komunës, Avni Kastrati dhe Armend Hasani janë dajë e nip, por ata thonë se kjo nuk ka ndikuar që ai të përfitojë nga prona komunale, meqenëse siç thonë ata, ky veprim është ndërmarrë duke u bazuar në ligjet në fuqi.

Shpërndaje.
© RAJONIPRESS