Aventurat e rrezikshme të Veselit

Kritikohet ashpër thirrja e seancës pa marrëveshje me opozitën.Kuvendi, peng i politikanëve të papërgjegjshëm

Analisti politik, Isa Mulaj, thotë se me këto veprime, që cenojnë demokracinë e mirëfilltë parlamentare, tanimë është fakt se Kuvendi dhe Qeveria e Kosovës haptas janë shndërruar në ndërmarrje private kriminale, por se kjo nuk duhet lejuar nga opozita dhe nga populli

Vendimi i Kryesisë së Kuvendit të Kosovës dhe kryeparlamentarit, Kadri Veseli, që pavarësisht situatës së tensionuar politike, të thirret përsëri seancë, derisa opozita mbetet e përjashtuar me 7 deputetë në paraburgim, cilësohet nga analistët politikë dhe shoqëria civile si një veprim i gabuar.

Me këto sjellje të arrogancës së numrave të pozitës vlerësohet se partitë në pushtet kanë filluar të zbulojnë fytyrën e vërtetë të regjimit totalitar, policor, të instaluar nga Thaçi e Mustafa.

Analisti politik Faik Krasniqi tha për “Kosova Sot” se thirrja e seancës nga kryetari i Kuvendit, Kadri Veseli, është hipokrizi në këtë gjendje të tensionuar politike, në të cilën ndodhet Kosova. Sipas tij, kjo seancë e thirrur nga Veseli vetëm do ta ndizte zjarrin akoma më shumë, derisa kemi shtatë deputetë të opozitës në burg dhe deputetët e tjerë të përjashtuar nga Kuvendi.”Para se të thirrej seanca e radhës, Qeveria pikësëpari është dashur menjëherë t’i lirojë nga burgu deputetët e opozitës, t’i kërkojë falje publike opozitës për dhunën e ushtruar ndaj saj dhe arrestimin e deputetëve, sidomos pas sulmit bizar dhe dhunës së ushtruar në selinë e VV-së”, u shpreh Krasniqi./kosova sot/