Avdijaj refuzon Zvicrën për Kosovën

Përfaqësuesja e Kosovës do të jetë e pasur me një tjetër talent për dy miqësoret e radhës kundër Turqisë dhe Senegalit.

Është sulmuesi i ri Albion Avdijaj, i cili e ka konfirmuar edhe vet që ka marrë ftesë nga përzgjedhësi Albert Bunjaku për dy miqësoret e Kosovës më 21 dhe 25 maj.
Përmes rrjetit social në Facebook, futbollisti i Grasshopersit ka thënë se ka zgjedhur Kosovën.

“Miqtë e mi, dëshirojë të ndajë me ju gëzimin, pasi kam marrë ftesë të luajë për reprezentacionin e Kosovës. Kjo është një ndjenjë e pa përshkruar për mua. Edhe pse kam lindur në Zvicër, ndjenjat e mia gjithmonë kanë qenë për t’i mbrojtur ngjyrat e shtetit të origjinës time, të vendlindjes së prindërve të mi. Me këtë rast më duhet të falënderoj përzgjedhësin e Republikës së Kosovës, z. Albert Bunjaku, FFK-në për besimin dhe të gjithë adhuruesit e mi. Shihemi në miqësoren Kosovë-Turqi dhe Kosovë-Senegal”, ka shkruar Avdijaj në Facebook.

20-vjeçari deri më tani ka qenë pjesë e Përfaqësueses së Zvicrës për grupmoshat U17, U18 dhe U19, ndërsa ka zhvilluar 14 ndeshje ku ka shënuar tre gola. Ndërkohë, ftesën e Kosovës e ka pranuar edhe futbollisti tjetër i Grasshopersit Imran Bunjaku, i cili po ashtu do të jetë i gatshëm për ndeshjet kundër Turqisë e Senegalit.
Mesfushori Bunjaku ka qenë kapiten i kombëtares U21 të Shqipërisë, duke zhvilluar 13 ndeshje me ‘kuqezinjtë’.
©KOHA.net