Avdijaj historik, nderohet me çmim nga federata gjermane

Një sukses historik për një kosovar. Federata e Futbollit të Gjermanisë (DFB) këtë vit ka vendosur ta nderojë djaloshin nga Kosova, Donis Avdijaj, me një çmim mjaft prestigjioz. Që nga viti 2005, DFB ndan çmimin ‘Fritz Walter’ për talentët në këtë vend, çmim i cili është edhe në nderim të legjendës së futbollit gjerman, Walter i cili ishte kapiten i Gjermanisë Perëndimore në triumfin e Botërorit të vitit 1954.

Këtë vit, federata gjermane vendosi që medaljen e bronztë për këtë çmim t’ia ndajë pikërisht Avdijajt, pas paraqitjeve fantastike të këtij të fundit me fanellën e Schalkes U17 dhe U19, si dhe me Përfaqësuesen U17 të Gjermanisë.

Avdijaj fitoi të bronztën në kategorinë U17, duke qenë pas dy talentëve, Timo Werner të Stuttgartit (i artë) dhe Julian Brandt të Wolfsburgut.

Kësisoj, Avdijaj u bë kosovari i parë që hyn në analet e futbollit gjerman me një sukses të tillë. Ndryshe, skuadra e Schalkes do të fitojë 10 mijë euro për zhvillimin e Avdijajt, si pjesë e shpërblimeve të çmimit. E këtë çmim në vitet e kaluara e kanë fituar edhe futbollistë gjerman si Mario Gotze, Manuel Neur, Toni Kroos e ganezi, Kevin-Prince Boateng …(Tribuna – Arena).