Autostrada e Gjilanit, një njollë e zezë për Qeverinë Kurti

Gjilan – Projekti i autostradës së Gjilanit po shndërrohet gjithnjë e më shumë në një simbol të zvarritjes institucionale dhe të mungesës së vendimmarrjes së qartë. Me ritmin aktual të punimeve, qytetarët e kësaj ane kanë gjithnjë e më pak shpresë se ky projekt i shumëpritur do të përfundojë në një afat të arsyeshëm.

Në kantierin e kësaj autostrade, që dikur konsiderohej një nga projektet strategjike për zhvillimin e rajonit, sot mbretëron heshtja. Mungesa e makinerive dhe e aktivitetit në terren ka krijuar përshtypjen e një projekti të braktisur, duke nxitur reagime dhe pakënaqësi të shumta tek qytetarët e Gjilanit.

Burimi, një qytetar nga Gjilani, thotë se kjo autostradë tashmë është shndërruar në një histori të pafund pritjeje.
“Nuk e kuptoj heshtjen e qeverisë përballë kësaj situate. Punimet duhet të rifillojnë urgjentisht dhe projekti të përfundojë, përndryshe zhgënjimi i qytetarëve do të jetë edhe më i madh”, shprehet ai.

Edhe Flamuri, një tjetër qytetar, vlerëson se përfundimi i autostradës duhet të jetë një nga prioritetet kryesore të qeverisë.
“Unë kam qenë votues i Lëvizjes Vetëvendosje, por sot ndjehem i zhgënjyer. Kjo çështje është zvarritur tej mase dhe qytetarët po e humbin besimin se projekti do të realizohet”, thotë ai.

Kritika ndaj zvarritjes së punimeve ka ardhur edhe nga opozita. Përmes një postimi ironik në rrjetet sociale, zyrtari i Aleanca për Ardhmërinë e Kosovës, Ardian Azemi, ka komentuar progresin e projektit.

“Punimet në autostradën e Gjilanit kanë arritur në 72.2 për qind. Shpresojmë të mos ketë ndonjë rrëshqitje dheu rrugës, që të mos na kthehet përqindja sërish në nivelin e vitit 2022, kur ishte 71.1 për qind. Autostrada po bëhet… zemra mal”, ka shkruar ai me ironi.

Ndërkohë, qytetarët e Gjilanit vazhdojnë të presin një përgjigje konkrete nga institucionet përgjegjëse për fatin e këtij projekti, i cili prej kohësh konsiderohet jetik për zhvillimin ekonomik dhe lidhjen infrastrukturore të rajonit../rajonipress/