ATK mbledhë 284 milionë euro

Administrata Tatimore e Kosovës (ATK) gjatë vitit që lëmë pas ka arritur t’i rritë të hyrat për 9 për qind në krahasim me vitin paraprak, duke i mbledh 284 milionë euro.

Drejtori i ATK-së Behxhet Haliti në konferencë për media ka thanë se ATK-ja ka një trend të vazhdueshëm pozitiv në rritjen e të hyrave tatimore ndër vite.

“Në tre vjetët e fundit të shprehura me numra të hyrat tatimore janë 284 milionë në vitin 2012, 261 milionë në vitin 2011 dhe 221 milionë në vitin 2010. Kjo ngritje është si rezultat i planifikimi të mirëfilltë, rritjes së bashkëpunimit me agjencitë e tjera, menaxhimit dhe punës ekipore të stafit të ATK-së”.

Kurse sa u përket borxheve ai thotë se për ta është një sfidë e trashëguar dhe akumuluar vite me radhë.

“Brenda ATK-së kemi funksionin mbledhjes së detyrueshme, e cila ka kryer mbi 76,000 aktivitete dhe ka grumbulluar rreth 37 milionë euro apo 5 milionë më shumë se vitin e kaluar. Krahas vjeljes së parave, aktivitetet e saj përfshijnë njoftime të tatimpaguesve, bllokimet në banka, Thesar, Dogana, regjistrimet e barrëve tatimore në kadastër, Regjistrin e Pengut, e shumë aktivitetet të tjera të sforcuara të dhëna me ligj”, ka thënë Haliti.

Ai ka thënë se objektiv për këtë vit është realizimi i planit të të hyrave, shtrirja e projektit të arkave fiskale, ngritja e kapaciteteve të njësisë për hetime tatimore dhe intelegjencës. (ORAinfo)