Asociacioni me kompetenca ekzekutive çrregullon sistemin politik

Asociacioni/Bashkësia e Komunave Serbe, në formën si po provohet të ndërtohet, rrezikon të jetë një strukturë “mbikomunale” me fuqi kontrolluese për komunat serbe, dhe kjo rrezikon sistemin unitar të vendit dhe sistemin qeverisës njëshkallësh, ka thënë për “Kohën Ditore”, njohësi i pushtetit lokal, Besnik Tahiri.

Sipas tij, ky proces do të duhej të ishte brenda kuadrit kushtetues dhe ligjor, ku do të mund të zbriteshin fuqi administrative, por jo edhe politike apo ekzekutive. Ai ka theksuar se vetë fjala Bashkësi – Zajednica – në gjuhën serbe, është shumë më shumë sesa shoqatë, por si një bashkësi ose unifikim i disa elementeve qoftë administrative e kështu me radhë.

Betejë e ashpër pritet të zhvillohet për kompetencat që do t’i ketë Asociacioni i Komunave me shumicë serbe. Kjo pikë, ndër më kryesoret e marrëveshjes së Brukselit, është ndër katër temat për të cilat palët javën e kaluar dështuan të arrinin marrëveshje. Zgjidhje këtyre çështjeve pritet t’u jepet në takimin e nesërm (e hënë) ndërmjet kryeministrave Mustafa -Vuçiq.

Si pala serbe po ashtu edhe ajo kosovare vazhdojnë të mos japin shume detaje rreth këtij Asociacioni.

Madje kryeministri serb, Aleksandar Vuçiq, duke folur për Asociacionin, tha se ai dhe zyrtarët e Brukselit kanë informata të rëndësishme sa i përket Asociacionit, por të cilat nuk mund t’i bëjnë publike.

http://koha.net/?id=27&l=64145