Artana me rregullore të re për eksploatimin e rërës dhe gurit natyror

Gjilan – Bajrush Ymeri kryetar i Artanës tha se draft rregullorja për mënyrën dhe kushtet e eksploatimit të rërës dhe gurit natyror tashmë është përgatitur dhe shpresohet që ajo të jetë funksionale dhe praktike.

Drejtoria e Urbanizmit, Kadastrit dhe Mbrojtjes së Ambientit, ka përgatitur Draft Rregulloren mbi Mënyrën dhe Kushtet e Eksploatimit të Rërës dhe Gurit Natyrorë.

Kryetari i Artanës, Bajrush Ymeri tha se kjo rregullore pritet të jetë praktike dhe e arsyeshme sepse ajo është përgatitur në bazë të Udhëzimeve Administrative dhe Ligjit për Mbrojtjen e Ambientit në fuqi.

“Kjo rregullore ka për qëllim mbrojtjen adekuate dhe ligjore të ambientit të pa prekur, dëmtuar dhe ndotur të komunës sonë, si dhe për dhënin e mundësisë të gjitha kompanive të regjistruara që të veprojnë dhe /punojnë në mënyrë të ligjshme dhe legale, dhe krijimin e të hyrave për komunën” tha Ymeri.

Sipas tij këto të hyra do të i rikthehen qytetarit të komunës në formën e investimeve kapitale. Për të pasur një përfshirje më të gjithanshme Komuna ka thirrur për debat publik edhe komponent e tjerë duke filluar nga shoqëria civile, përfaqësues të bizneseve etj.

Diskutimi publik mbahet javën e ardhshme në fshatin Bostan, dhe Stanishor./rajonipress/