Arta Bajralija takon KFOR-in, fokus në siguri dhe bashkëpunim ndërinstitucional

Kamenicë – Nënkryetarja e Komunës së Kamenicës, Arta Bajralija, së bashku me zëdhënësen Lidiona Marovca, kanë pritur në një takim përfaqësues të KFOR, në kuadër të angazhimeve për forcimin e bashkëpunimit dhe rritjen e sigurisë në komunë.

Gjatë këtij takimi janë diskutuar mundësitë konkrete të bashkëpunimit në organizimin e “Ditës së Komuniteteve”, një aktivitet që synon promovimin e bashkëjetesës, diversitetit kulturor dhe forcimin e kohezionit social në Komunën e Kamenicës.

Një nga temat kyçe ishte edhe mbështetja për përforcimin e kapaciteteve të njësisë së zjarrfikësve, ku u theksua nevoja për avancimin e pajisjeve, zhvillimin e trajnimeve dhe rritjen e bashkëpunimit operacional, me qëllim përmirësimin e reagimit në situata emergjente.

Po ashtu, palët diskutuan për thellimin e bashkëpunimit në fushën e sigurisë, duke vlerësuar rolin e rëndësishëm të KFOR-it në garantimin e një ambienti të sigurt për të gjithë qytetarët.

U theksua se ky bashkëpunim do të vazhdojë të forcohet përmes iniciativave të përbashkëta dhe komunikimit të vazhdueshëm ndërinstitucional./rajonipress/