Gjilan – Me gjithë përpjekjet e udhëheqjes komunale për krijimin e kushteve sa më të mira dhe donacioneve ndërkombëtare, që nuk kanë qenë të vogla, dhe për të cilat u jem mirënjohës, problemet në arsim, në komunën e Gjilanit janë akoma të mprehta dhe kërkojnë kohë për tu zgjidhur mendon Saranda Bllaca.
Saranda Bllaca nga komisioni për arsim i LDK-së ka thënë se gjendja aktuale e arsimit në komunën tonë, me hiq apo pak ndryshime është e lidhur dhe e kushtëzuar me arsimin ne Kosovë, në përgjithësi me Ministrinë e Arsimit, Shkencës dhe Teknologjisë. Sot arsimi në Kosovë, posaçërisht në komunën tonë, po vazhdon të kalojë nëpër sfida të rënda ka thënë ajo.
Me gjithë përpjekjet e udhëheqjes komunale për krijimin e kushteve sa më të mira dhe donacioneve ndërkombëtare, që nuk kanë qenë të vogla, dhe për të cilat u jem mirënjohës, problemet në arsim, në komunën e Gjilanit janë akoma të mprehta dhe kërkojnë kohë për tu zgjidhur mendon Bllaca.
Sipas saj njëra ndër problemet më të theksuara është mungesa e hapësirës shkollore, sidomos në shkollat e mesme, ku mësimi jo vetëm që zhvillohet në tri ndërrime, por edhe me orar të shkurtër, që është jashtë çdo norme të standardeve në arsim.
Mungesa e kabineteve, bibliotekave, sallave të edukatës fizike, pajisjeve me internet, etj, japin të dhëna për të kuptuar se sa larg qëndrojmë nga një arsimim bashkëkohor e cilësor i nxënësve tanë.
Bllaca ka përmendur disa raste siç janë numri i mungesave të nxënësve që është jashtëzakonisht i madh,nuk ndërmerren masa disiplinore ndaj shkelësve të ligjit të arsimit dhe rregulloreve në fuqi,siguria e nxënëseve dhe e mësimdhënësve nuk është në nivel të duhur,centralizimi i tepruar në organet e larta të arsimit;.
Bllaca ka përmendur edhe nevojën e plotësimit të inventarit nëpër shkolla, banka, karriga, tabela, gëlqerosje. Pastaj mungesa e kabineteve të informatikës,numër i stërngarkuar i nxënësve në paralele në gjimnazin „Zenel Hajdini” dhe në shkollën e mjekësisë „Dr.Asllan Elezi”, ku drejtoria e Arsimit në pranimin e nxënësve nuk e zbaton konkursin ashtu siç duhet etj.
Bllaca e cila edhe është këshilltare komunale tha se ekskursionet e nxënësve janë shndërruar në biznese duke ndryshuar krejtësisht karakterin dhe qëllimin e tyre, të cilat janë jashtë planprogramit mësimor.
Bllaca pastaj është marrë edhe me foton e Rugovës.” Disa drejtorë të shkollave më shumë preokupohen me probleme politike, duke e hekur nga shkolla fotografinë e ish presidentit Dr.Ibrahim Rugova, se sa me zhvillimin e procesit mësimor dhe rezultatet e punës”
Ajo ka dhënë vërejtje dhe tek pastërtia dhe higjiena nëpër shkolla ku mbahet nga kompani private të cilat nuk i paguajnë punëtoret me rregull, andaj edhe puna e tyre është jo në nivel;
Sipas Bllacës, Ministria e Arsimit edhe këtë vit, si përherë, organizoi dobët testin e maturës si në aspektin teknik, ashtu edhe atë përmbajtësor, ku testet nuk kanë qenë në përputhshmëri me plan programin mësimor.
Bllaca tha se Komisioni i Arsimit i LDK-së shpreson se vërejtjet e tyre kanë për qëllim përmirësimin e më tejmë të punës në institucionet tona arsimore si dhe propozon drejtorisë së Arsimit t’i realizoj me përpikëri prioritetet dhe objektivat konkrete të planit vjetor të Drejtorisë për vitin shkollor 2012/2013 dhe ato që parasheh për vitin 2012/2013.
Bllaca ka dhënë edhe pika rekomanduese si Organizimi i ekskursioneve për maturantë të ndryshojë, jo vetëm për kohën kur mbahet, por edhe karakterin dhe pjesëmarrjen e nxënësve, mënyrën e financimi dhe stimulimit,mbyllja e kafiterive për rreth shkollave,pajisja e nxënësve me tekste mësimore sipas planit mësimor për shkollat dhe drejtimet profesionale./rajonipress/
