Arroganca e Koalicionit

Fatmir Limaj e ka quajtur Koalicionin Qeverisës PDK-LDK arrogant, ndërsa ka pohuar se sjelljet e tyre tregojnë papërgjegjësi për gjendjen në vend, josinqeritet dhe hipokrizi.

Kështu, Lideri i Nismës për Kosovën, në një deklarim në llogarinë e tij në Facebook, ka komentuar vendimin e Kryesisë së Kuvendit që seancën për Interpelancë me Kryeministrin lidhur me Jablanovic e ka shtyrë një ditë pas protestës.

“Koalicioni qeverisës po vazhdon të udhëhiqet me logjikën e arrogancës së numrave”.

“Besoj të gjithëve ju kujtohet se këto ditë drejtuesit e koalicionit qeverisës ftonin që për rastin Jablanovic dhe për çështje tjera të zhvillohet dialog në Kuvend dhe jo përmes protestave”.

“Se ata nuk janë të sinqertë dhe po bëjnë hipokrizi, tregon më së miri mbledhja e sotme e Kryesisë së Kuvendit, e cila në vend që seancen për interpelancë me Kryeministrin për çështjen Jablanovic të thirrur nga opozita ta mbajë nesër, pra një ditë para protestës që do t’i jepte mundësi të gjithëve të debatojmë për këtë çështje, Kryesia e Kuvendit sot vendosi që seanca për interpelancë për Ministrin Jablanovic të mbahet në ditën e enjte, një ditë pas protestës”.

“Kjo sjellje arrogante e koalicionit qeverisës edhe një herë tregon papërgjegjësi për gjendjen në vend, josinqeritet dhe hipokrizi”.