RCCOLA

Arrestohet për armëmbajtje pa leje kreu i KBI-së të Kaçanikut

/ 2 minuta lexim

Kaçanik – Florim Neziraj, kryetar i Këshillit të Bashkësisë Islame të Kaçanikut, është arrestuar nga policia të premten si i dyshuar për armëmbajtje pa leje.

Burime brenda Stacionit policor të Kaçanikut i kanë thënë “Kohës Ditore” se në veturën e të ndaluarit është gjetur një pistoletë dhe një neutralizues elektroshok.

Vetura e Nezirajt ishte kontrolluar në njërën nga rrugët e qytetit. Pohimet e këtyre burimeve i ka konfirmuar Agim Gashi, zëdhënës i Policisë Rajonale të Ferizajt. “Në veturën private të kryetarit të KBI-së të Kaçanikut, Florim Neziraj, është gjetur një armë manovruese, e ndaluar të bartet nga persona të paautorizuar, dhe një elektroshok”, ka thënë Gashi.

Uji Dea

“Arma dhe elektroshoku janë gjetur në veturën e Nezirajt, në të cilën ndodheshin tre veta. Pa u kryer hetimet nuk mund të themi se cilit nga këta persona u përkasin ato armë”, ka sqaruar togeri Gashi.

Florim Neziraj është emëruar kryetar i KBI-së sivjet, në janar, ndërsa ardhja e tij në krye të komunitetit mysliman të Kaçanikut është kontestuar nga pararendësi i tij, Musli Vërbani dhe mbështetësit e tij. Emërimi i Nezirajt është kundërshtuar edhe me protesta gjatë të cilave ka pasur edhe të arrestuar për dëmtim të pronës dhe prishje të rendit e të qetësisë publike.